engliye bélarusiyege qoshumche émbargo yürgüzüshni qarar qildi

türkiye awazi radiyosi xewiri: engliye rusiyening ukrainadiki tajawuzchiliq heriketlirini yéqindin qollap kelgen bélarusiyedin mehsulat import qilish we bélarusiye taratqulirining teshwiqat bilen shughullishining aldini élish üchün, bir qatar yéngi tedbirlerni yolgha qoyushni qarar qildi.

engliye tashqi wazariti bayanat élan qilip, rusiyening ukrainadiki tajawuzchiliq heriketlirige qolayliq yaritip bérishni aktip dawamlashturuwatqan bélarusiyege téximu köp jaza yürgüzüshning qarar qilinghanliqini uqturdi.

qoshumche jaza pilanining bélarusiyedin altun, simont, yaghach we kawchuk qatarliqlarni import qilishni chekleshni öz ichige alidighanliqi eskertilgen bayanatta, jazalarning engliyedin bélarusiyege neq pul, mashina, ximiyelik we biyologiyelik qoral ishlepchiqirishta ishlitilidighan madda, téxnika we matériyallarning éksport qilinishinimu öz ichige alidighanliqi qeyt qilindi.

bélarusiyening yalghan uchurlarni tarqitishni dawamlashturuwatqanliqighimu isharet qilinghan bayanatta yene, alaqidar orunlargha bélarusiyening tizimlikke kirgüzülgen axbarat wasitilirining engliyede torni öz ichige alghan her qaysi wasitilerde teshwiqat élip bérishigha tosqunluq qilish hoquqi bérilgenliki eskertildi.