иранниң җиддәдики консулханиси қайтидин ечилди

түркийә авази радийоси хәвири: иран рәсмий хәвәр агентлиқи (IRNA) ниң хәвиригә қариғанда, иранниң сәуди әрәбистанниң җиддә шәһиридики консулханиси вә иранниң ислам һәмкарлиқ тәшкилатидики даимий вакаләтханисиниң қайтидин ечилиш мурасимиға, һәр икки дөләтниң рәһбәрлири иштирак қилған.

6-ийун күни (2023) иранниң рийадта турушлуқ әлчиханисиниң ечилишидин кейин, җиддәдики консулханиси билән ислам тәшкилатидики даимий вакаләтханисиму қайтидин ечилди.

сәуди әрәбистанда 2016-йили 1-айниң 2-күни шиә алим нимр әннимрниму өз ичигә алған 47 киши «террорлуқ» җинайити билән әйиблинип өлүм җазасиға һөкүм қилғаниди.

иран даирилириниң өлүм җазасиға наразилиқ билдүрүп, арқиму арқа байанатларни елан қилишидин кейин, сәуди әрәбистанниң теһран әлчиханиси вә мәшһәд шәһиридики консулхана бинасиға ирандики намайишчилар тәрипидин от қойуветилгәниди.

бу һуҗумлардин кейин, сәуди әрәбистан һөкүмити 3-йанвар иран билән дипломатик мунасивәтни үзгәнликини елан қилғаниди.

рийад билән теһран аридин йәттә йил өткәндин кейин, 10 – март күни бейҗиңда хитай даирилириниң мурәссәчиликидә дипломатик мунасивәтләрни икки ай ичидә қайтидин әслигә кәлтүрүшкә пүтүшкәниди.

иран ташқи ишлар министири һүсәйин әмир абдуллаһйан билән сәуди әрәбистан ташқи ишлар вәзири фәйсәл бин фәрһан 6-апрел күни бейҗиңда көрүшүп, икки дөләтниң әлчиханилирини қайтидин ечиш, икки дөләт оттурисидики айропилан сәпәрлирини қайтидин ишқа кириштүрүш вә виза рәсмийәтлирини қолайлаштуруш мәсилисидә бирдәклик һасил қилғаниди.

иран 23-май күни муавин ташқи ишлар министири әли риза енайетиниң рийад баш әлчиси сүпитидә вәзипигә тәйинләнгәнликини уқтурған, 6 – ийун күни иранниң рийад әлчиханиси қайтидин ечилғаниди.