dunyaning eng chong awiyamatkisi natoning qomandanliqida wezipe öteydu
amérikaning USS Gerald R.Ford namliq awiyamatkisi norwégiye déngizidiki pilanliq heriketlerning bir qismi süpitide shimaliy atlantik ehdi teshkilati — natoning qomandanliqigha ötti.
türkiye awazi radiyosi xewiri: nato bayanat élan qilip, dunyaning eng chong awiyamatkisi— USS Gerald R.Ford ning hemrahliqidiki paraxotlar bilen birlikte 2 - iyundin bashlap nato qomandanliqi astida déngiz- okyan bixeterlik paaliyetliri we meshiqlerni élip baridighanliqini uqturdi.
bayanatta körsitilishiche, aldin pilanlanghan paaliyetler dairiside, yawropadiki amérika awiyamatkisigha amérika wezipe guruppisidiki qoghlighuchi paraxotliri bilen sayahet paraxotliri hemrah bolidiken.
undin bashqa, natogha eza bir qisim döletlerning déngiz armiyesi eskerlirimu nato qomandanliqidiki mezkur awiyamatka bilen birlikte heriket qilidiken.
otturigha qoyulushiche, F-18 urush ayropilani, baldur agahlandurush ayropilanliri, tiransiport ayropilanliri we tik uchar ayropilanlarni élip mangghan amérika awiyamatkisining natoning qomandanliqigha ötüshi, atlantik okyan halqighan ittipaqliqni dawamlashturushning muhim ishariti iken.
bu qedem yene, nato ittipaqdashliri arisidiki qomandanliq we kontrol qurulmisining öz-ara almishishchanliqi we chaqqanliqini namayan qilip béridiken.
awiyamatkaning bu bir hepte boyiche nato qomandanliqida wezipe öteydighanliqi qeyt qilindi.