stolténbérg pat yéqinda türkiyede ziyarette bolidighanliqini bildürdi
shimaliy atlantik ehdi teshkilati — nato bash katipi yéns stolténbérg pat yéqinda türkiyede ziyarette bolup, jumhur reis rejep tayyip erdoghan bilen shiwétsiyening natogha eza bolushi mesilisini muzakire qilidighanliqini éytti.
türkiye awazi radiyosi xewiri: stolténbérg norwégiyening paytexti osloda ötküzülgen gheyri resmiy tashqi ishlar ministirliri yighinidin ilgiri muxbirlarning soallirigha jawab berdi؛ u shiwétsiyening natogha eza bolush mesilisige munasiwetlik bir soalgha, özining hepte béshida jumhur reis rejep tayyip erdoghan bilen téléfonlashqanliqini eskertken halda jawab bérip: «men pat yéqinda enqerege barimen, éniq waqti téxi békitilmidi» dédi.
stolténbérg shiwétsiyening natogha eza bolush kélishimining testiqlinishi heqqide türkiyege qandaq uchurlarni béridighanliqi toghrisidiki bir soalgha: «méning uchurim shuki, shiwétsiyening natogha eza bolushi shiwétsiye üchün paydiliq bolghinidek, sikandinawiye döletliri, baltiq déngizi rayoni, shundaqla nato, türkiye we bashqa ittipaqdashlar üchünmu paydiliq. uningdin bashqa, bügündin, yeni 6- ayning 1- künidin bashlap, shiwétsiyede yéngi térrorluqqa qarshi turush qanunining ijra qilinishqa bashlighanliqidin ibaret réalliqni tekitleymen. bu shundaqla shiwétsiyening madridta imzalanghan üch terep kélishimidiki mejburiyetlirini ada qilghanliqining pakiti bolidu. türkiyening bir qisim yolluq bixeterlik endishilirining barliqini untumasliqimiz kérek. chünki héchbir ittipaqdash dölet türkiyege oxshash térrorluq hujumlirigha uchrap baqmidi. shunga térrorluqning barliq türlirige qarshi türkiye bilen hemkarlishishimiz nahayiti muhim. men shiwétsiyening natogha kirish kélishimining pat yéqinda testiqlinidighanliqigha ishinimen» dep jawab berdi.
u yighindin kéyin élan qilghan bayanatidimu, türkiyediki jumhur reis saylimi we 28 – nöwetlik parlamént ezaliri saylimining axirlashqanliqini, nöwette türkiye emeldarliri bilen shiwétsiyening nato ezaliqigha munasiwetlik söhbetni qayta bashlash toghrisida sözlishishni xalaydighanliqini eskertti.
