blinkén: amérika türkiyege ayropilan sétip bérishni shiwétsiyening natogha eza bolushigha baghlimaydu
amérika tashqi ishlar ministiri antoni blinkén jo baydin hökümitining türkiyege F-16 tipliq küreshchi ayropilanlarni sétip bérish mesilisini shiwétsiyening shimaliy atlantik ehdi teshkilati — natogha eza bolushi bilen munasiwetleshtürmeydighanliqini éytti.
türkiye awazi radiyosi xewiri: antoni blinkén shiwétsiyening luléa shehiride shiwétsiye bash ministiri ulf kiristérson bilen ötküzgen qoshma muxbirlarni kütüwélish yighinida söz qildi.
amérika tashqi ishlar ministiri antoni blinkén shiwétsiyening natogha eza bolushi toghrisidiki bir soalgha jawab bérip: «natogha eza bolush bir jeryan. bu jeryanda ittipaq ezaliri özliri endishe qilidighan mesililerni otturigha qoyalaydu. elwette türkiyemu yéqinqi bir nechche ay ichide shundaq qildi» dédi.
u shiwétsiye bilen finlandiyening türkiyening endishisini bir terep qilish yolida körünerlik qedemlerni tashlighanliqini bayan qilip: «méningche ittipaqning barliq ezalirining bir qisim (bixeterlik) mesililirige ehmiyet bérishi türkiyening muweppeqiyiti. bu endishilerni yoqitish yolida konkért qedemlerni tashlash bolsa, shiwétsiye bilen finlandiyening muweppeqiyiti» dédi.
u amérikaning türkiyege F-16 tipliq küreshchi ayropilanlarni sétip bérishining shiwétsiyening natogha eza bolushining testiqlinishigha baghliq ikenliki toghrisidiki qarashlar heqqide toxtilip, bu ikkisining oxshimighan mesililer ikenlikini éytti.
antoni blinkén jo baydin hökümitining türkiyege F-16 tipliq küreshchi ayropilanlarni sétip bérish mesilisini shiwétsiyening eza bolushi bilen munasiwetleshtürmeydighanliqini, türkiyege küreshchi ayropilan sétip bérishning amérikaning menpeetige uyghun ikenlikini, emma her ikki mesilide baldurraq ilgirilesh hasil qilish kéreklikini otturigha qoydi.
shiwétsiye bash ministiri kiristérsonmu amérikaning shiwétsiyening natogha eza bolushini qollighanliqigha rehmet éytti.
kiristérson bir soalgha jawab bérish jeryanida, türkiye bilen nato eza bolush mesilisige munasiwetlik alaqining dawam qiliwatqanliqini, dölitining türkiye, shiwétsiye we finlandiye otturisida imzalanghan üch dölet kélishimidiki teleplerni orundighanliqini ilgiri sürdi.
u türkiyening qararigha hörmet qilidighanliqlirini bildürüp: «nöwette biz ularning qarar chiqirishini kütüwatimiz» dédi.
shuning bilen bir waqitta, aqsaray bayanatchisi karin zhan pyér kündilik muxbirlarni kütüwélish yighinida, amérika pirézidénti baydinning türkiyege F-16 tipliq küreshchi ayropilanlarning sétilishini qollaydighanliqini éniq otturigha qoyghanliqini eskertip, shiwétsiyening natogha eza bolushining buning bir sherti emeslikini tekitlidi.
