sudandiki qanliq tuqunushlar tünügün qaytidin ewj aldi

türkiye awazi radyosi xewiri: sudanda aprélning otturiliridin buyan dawam qiliwatqan armiye bilen yérim herbiy téz qollash etriti (HDK) otturisidiki toqunush, amérika we seudi erebistanning muresse qilishi bilen 22-may (2023) da imzalanghan bir heptilik urush toxtitish kélishimige shundaqla amérikaning émbargo tehditige qarimastin tünügün qaytidin ewj aldi.

shahitlarning sözige asaslanghanda, paytext xartumning gherbige jaylashqan mugrén mehellisi her ikki terep éghir tipliq qorallarni ishletken toqunushlargha sehne bolghan. urush ayropilanliri paytext asminida toxtimay uchqan we rayonda shiddetlik partlashlar anglanghan.

terepler, amérika we seudi erebistanning muressechilikide 20 - mayda urush toxtitishni élan qilghan hemde shu yerning waqti 21.45 din bashlap kélishimning küchke ige bolidighanliqini élan qilishqan idi.

amérika tashqi ishlar ministiri antoni blinkén urush toxtitish küchke ige bolup bir kündin kéyin, sudan généralliri axirqi urush toxtitish kélishimige emel qilmighan teqdirde émbargogha uchraydighanliqini agahlandurghan idi.

sudan dölet mudapie ministirliqi tünügün pénsiyege chiqqan eskerler we qoral tutushni bilidighanlargha qarita seperwerlik élan qilghan idi.  

paytext xartum we uning etrapidiki toqunushlar keskinleshken rayonlardin dölet ichidiki bixeter rayonlargha qéchishtin bashqa yene, süriye, yemen we misir qatarliq sudanda puqrasi köp döletlerning öz puqralirini tarqaqlashturush xizmetliri dawamlashmaqta.