amérika rusiye – bélarusiye kélishimige inkas qayturdi

türkiye awazi radiyosi xewiri: aqsaray bayanatchisi kariné jéan piérré kündilik muxbirlarni kütüwélish yighinida, rusiye bilen bélarusiye otturisida taktikiliq yadro qorallirini bélarusiyege orunlashturushni resmiyleshtürüsh kélishimining imzalanghanliqini, bu kélishimning amérikagha qilche tesir körsitelmeydighanliqini qeyt qildi.

u rusiyening yadro qorallirini ishlitishke teyyarliq qiliwatqanliqining héchqandaq alamiti yoqluqini eskertti, hemde rusiyening bu qedimini «mesuliyetsizlik qilish we ighwagerchilik yolini tallashning yene bir misali» dep atidi.

piérré shimaliy atlantik ehdi teshkilati- natoning kolléktip halda özini mudapie qilish hoquqining barliqini, özliriningmu buninggha qetiy emel qilidighanliqlirini tekitlidi.

amérika qoshma ishtatliri tashqi ishlar ministirliqi bayanatchisi mat millérmu bélarusiyening rusiye bilen taktikiliq yadro qoralliri kélishimi imzalishini eyiblep mundaq dédi: «bu rusiyening bir yildin köprek waqit ilgiri ukrainagha omumyüzlük tajawuz qilishi jeryanidiki mesuliyetsizliklirining eng yéngisi hésablinidu.»

millér rusiyening ukraina bilen bolghan urushta biyologiyelik, ximiyelik yaki yadro qorallirini ishlitishining éghir bedelliri bolidighanliqini, buni ilgirimu otturigha qoyghanliqlirini qeyt qildi.

rusiye dölet mudapie ministiri sérgéy shoygu bilen bélarusiye dölet mudapie ministiri wiktor xrénén tünügün (26-may) bélarusiyede taktikiliq yadro qorallirini orunlashturush toghrisidiki höjjetlerge imza qoyghanidi.

xrénén buning gherb döletlirining «dostane bolmighan» we «tajawuzchiliq» siyasitige bérilgen jawab ikenlikini tekitligenidi.