daniye bilen gollandiye natoning ukraina armiyesini terbiyelesh qismigha bashchiliq qilidu
amérika dölet mudapie ministiri loyd ostin (Lloyd Austin) ukraina armiyesini «F-16» meshiqi qildurush üchün qurulghan yawropa birleshme qismigha daniye bilen gollandiyening bashchiliq qilidighanliqini bildürdi.
türkiye awazi radiyosi xewiri: amérika dölet mudapie ministiri loyd ostin mudapie uchrishish guruppisi yighinini axirlashturup, amérika armiye qomandanliq ishtabi bashliqi mark milléy (Mark Milley) bilen birlikte axbarat élan qilish yighini ötküzdi.
u ukraina armiyesining bezi hel qilghuch qabilyet jehettiki yétersizlikliri üstide söhbet ötküzgenliklirini eskertip: «ukrainaning eng muhim éhtiyaji quruqluqta qurulidighan hawa mudapie qabiliyitini östürüsh hésablinidu. uchrishish guruppisi ukrainaning hawa tewelikini mudapie qilish qabiliyitini östürüsh üchün zor tirishchanliq körsitidu» dédi.
u ukraina uchquchilirini «F-16» ayropilani boyiche terbiyelesh mesilisining muzakire qilinghanliqini bildürüp, kéyinki heptilerde bashlinidighan telim-terbiyeler üchün qurulghan yawropa birleshme qisimgha, gollandiye bilen daniyening bashchiliq qilidighanliqini eskertti.
u ikki döletning amérika we bashqa ittipaqdashliri bilen zich alaqe qilip, telim-terbiye pirogrammilirini ilgiri süridighanliqini eskertti.
u mundaq dédi:
«norwégiye, bélgiye, portugaliye we polsha qatarliq döletlermu telim-terbiye ishlirigha küch chiqirishni teklip qildi. biz téximu köp döletlerning bu muhim ishqa qétilishini ümid qilimiz.»
amérika armiye qomandanliq ishtabi bashliqi mark milléy hawa tewelikini kontrol qilishning muhim mesile ikenlikini tekitlep: «ukraina yéqinqi 1 yérim yilda hawa tewelikini qoghdashning eng téz we eng erzan yolining quruqluqta hawa mudapie sistémilirini qurush ikenlikini nahayiti ochuq körsitip berdi» dédi.
u amérikaning bu sewebtin ukrainani her xil mudapie sistémiliri bilen teminligenlikini, bügüngiche ukrainaning bérilgen barliq qoral sistémiliridin ünümlük paydilanghanliqini, pat yéqinda «F-16» ayropilanliridinmu ünümlük paydilinidighanliqini qeyt qildi.
