ياۋروپا رۇسىيە مەركىزىي بانكاسىنىڭ 200 مىليارد ياۋرودىن ئارتۇق پۇلىنى توڭلاتقان

تۈركىيە ئاۋازى رادىيوسى خەۋىرى: ياۋروپا ئىتتىپاقى كومىتېتىنىڭ باياناتچىسى كرىستىيان ۋىگاند (Christian Wigand) بېلگىيە پايتەختى بىريۇسسېلدا ئۆتكۈزۈلگەن كۈندىلىك ئاخبارات ئېلان قىلىش يىغىنىدا، ياۋروپانىڭ ئۇرۇش سەۋەبىدىن ھازىرغىچە توڭلىتىلغان رۇسىيە مەركىزىي بانكاسىنىڭ مال-مۈلۈكلىرى ھەققىدە بايانات ئېلان قىلدى.

ئۇ مۇنداق دېدى:

«ياۋروپا ئىتتىپاقىنىڭ 10-قېتىملىق ئېمبارگو پىلانى دائىرىسىدە، ئەزا دۆلەتلەردىكى ئورگانلار رۇسىيە مەركىزىي بانكاسىنىڭ توڭلىتىلغان مال-مۈلۈك ۋە پۇللىرىنى 12-ماي (2023) غىچە ياۋروپا ئىتتىپاقى كومىتېتىغا دوكلات قىلىشى كېرەك ئىدى. ياۋروپا ئىتتىپاقى شۇ بويىچە دۆلەتلىرى كومىتېتقا رۇسىيە مەركىزىي بانكاسىنىڭ 200 مىليارد ياۋرودىن ئارتۇق مال-مۈلۈكلىرىنى توڭلاتقانلىقىنى دوكلات قىلدى.»

ئۇ ئۇكرائىناغا سالغان زىياننى رۇسىيەگە تۆلىتىشتە قەتئىي ئىكەنلىكلىرىنى كۆرسىتىپ، بۇ مەسىلىدىكى خىزمەتلەرنىڭ جىددىي ئېلىپ بېرىلىۋاتقانلىقىنى ئېيتتى.

ئۇ رۇسىيەنىڭ توڭلىتىلغان مال-مۈلۈكلىرىنى ئۇكرائىنا ئۈچۈن ئىشلىتىش تەدبىرلىرىدىن بىرىنىڭ رۇسىيە مەركىزىي بانكاسىنىڭ مال-مۈلكى ئىكەنلىكىنى ئەسكەرتىپ،  بۇ مۈلۈكلەرنىڭ ئۆسۈمىنى ئۇكرائىنا ئۈچۈن ئىشلىتىش مۇمكىنلىكىنى ئوتتۇرىغا قويدى.

غەرب دۆلەتلىرىدە رۇسىيە-ئۇكرائىنا ئۇرۇشى سەۋەبىدىن رۇسىيە مەركىزىي بانكاسىنىڭ 300 مىليارد دوللاردىن ئارتۇق پۇلى توڭلىتىلدى.