نىگېرىيەدىكى قوراللىق ھۇجۇمدا 87 كىشى قازا قىلدى
نىگېرىيە ساقچىلىرى پلاتېئۇ ئۆلكىسىدە 15-مايدا يۈز بەرگەن قوراللىق ھۇجۇمدا 87 كىشىنىڭ قازا قىلغانلىقىنى بىلدۈردى.
تۈركىيە ئاۋازى راديوسى خەۋىرى: پلاتېئۇ ئۆلكىلىك ساقچى ئىدارىسى باياناتچىسى ئالابو ئالفرېد 15-مايدا فۇڭزاي ۋە كۇبيات يېزىلىرىغا قىلىنغان ھۇجۇمدا 87 كىشىنىڭ قازا قىلغانلىقىنى ۋە 39 كىشىنىڭ يارىلانغانلىقىنى ئېلان قىلدى.
ئالفرېد يارىلانغانلارنىڭ ئۆلكىنىڭ ئوخشىمىغان جايلىرىدىكى دوختۇرخانىلاردا داۋالىنىۋاتقانلىقىنى بىلدۈرۈپ، ھۇجۇمغا چېتىشلىق 7 كىشىنىڭ قولغا ئېلىنغانلىقىنى ئەسكەرتتى.
ئالفرېد قولغا ئېلىنغانلارنىڭ كېرەكلىك تەكشۈرۈش ئاخىرلاشقاندىن كېيىن سوتقا چىقىرىلىدىغانلىقىنى ئۇقتۇردى.
پلاتېئۇ ئۆلكىسىگە قاراشلىق فۇڭزاي ۋە كۇبيات يېزىلىرىدا 15-مايدا كەچتە قوراللىق ھۇجۇم يۈز بەرگەن ئىدى.
مۋاگاۋۇل تەرەققىيات جەمئىيىتىنىڭ رەئىسى جوسېف گۋانكات ھۇجۇمدا 125 كىشىنىڭ ھاياتىدىن ئايرىلغانلىقىنى ئېلان قىلغان ئىدى.
دۆلەت مەتبۇئاتلىرىدىكى خەۋەرلەردە تەخمىنەن 20 مىڭ كىشىنىڭ ئۆي-ماكانلىرىنى تاشلاپ، چېركاۋ، مەكتەپ ۋە ئوچۇق يەرلەردە پاناھلانغانلىقى ئىلگىرى سۈرۈلگەن ئىدى.
ھۇجۇمدىن كېيىن، ئۆلكىدە زوراۋانلىقنىڭ ئالدىنى ئېلىش ئۈچۈن 24 سائەتلىك كوچىغا چىقىش چەكلىمىسى ئېلان قىلىندى.
مۇناسىۋەتلىك خەۋەرلەر
پولشا: زېمىنىمىزغا يادرو قوراللىرىنى ئورۇنلاشتۇرۇشقا تەييارمىز
پولشا ئۆز زېمىنىغا يادرو قوراللىرىنى ئورۇنلاشتۇرۇشقا تەييار ئىكەنلىكىنى بىلدۈردى.