shiende chaqirilghan «xitay - ottura asiya jumhuriyetliri bashliqlar yighini» dawamlashmaqta
xitay bilen ottura asiyadiki besh jumhuriyetni bir yerge jem qilghan xitay - ottura asiya bashliqlar yighini tarixiy yipek yolining bashlinish nuqtisi dep qariliwatqan xitayning shenshi ölkisining merkizi shiende bashlandi.
türkiye awazi radiyosi xewiri: bashliqlar yighinining échilish murasimi shienning shimalidiki 7 - esirdin 10 - esirgiche bolghan ariliqta xitayda hökümranliq qilghan tang sulalisini xatirilesh üchün yasalghan jennet baghchisidiki binepshe bulut sariyida ötküzüldi.
xitay dölet reisi shi jinping bilen repiqisi ping liyüen sarayning aldida méhman rehberler we ularning repiqilirini kütüwaldi.
murasimgha qazaqistan pirézidénti qasim jömert toqayéw, qirghizistan pirézidénti sadir japarow, tajikistan pirézidénti imameli rahman, türkmenistan pirézidénti serdar berdimuhemmedow we özbékistan pirézidénti shewket mirziyayéw qatarliqlar qatnashti.
rehberler bashliqlar yighini ishtirakchilirigha bérilgen kechlik ziyapette bir yerge jem boldi؛ xitay dölet reisi shi jinping ziyapet esnasidiki sözide, tarixiy yipek yolining gherbtiki bashlinish nuqtisi bolghan shenshi ölkisining 2000 yildin buyan xitay bilen ottura asiya döletliri otturisidiki chongqur dostluq rishtisige shahit bolup kelgenlikini eskertip: «xelqlirimiz ming yillardin buyan mallar we pikirlerni almashturup keldi, bir – biridin öginish arqiliq insaniyet tarixining eng yarqin sehipisi bolghan qedimki yipek yolining heshemitini birlikte wujudqa chiqardi» dédi.
xitay bilen ottura asiya jumhuriyetlirining 1992 - yili diplomatik munasiwet ornatqandin buyan, xelqara muhitning özgirishige qarimay, izchil halda bir - birini hörmetlep we qollap kelgenlikini, yaxshi qoshnidarchiliq we öz ara menpeet yetküzüshning kuyida bolghanliqini tilgha alghan xitay dölet reisi shi jinping, munasiwetlerning waqitning ötüshige egiship tarixiy sekresh hasil qilip, yaxshi qoshnidarchiliqtin istratégiyelik shériklikke we «ortaq kelgüsini ortaqlishighan jemiyet»ke aylanghanliqini éytti.
u xitay - ottura asiya hemkarliqining bu bir ewlad rehberlerning kelgüsidiki ortaq istratégiyelik tallishi ikenlikige isharet qilip, bu qétimqi bashliqlar yighinining munasiwetlerdiki yéngi dewrning bashlanghuchi bolidighanliqigha toluq ishinidighanliqini tekitlidi.
xitay - ottura asiya bashliqlar yighini béyjing bilen ottura asiya jumhuriyetliri otturisidiki «C + C5» hemkarliqining dölet bashliqliri qatlimidiki tunji yighini bolup hésablinidu.
