xitay - ottura asiya bashliqlar yighini shiende dawamlashmaqta
xitay dölet reisi shi jinping tunji qétimliq xitay - ottura asiya bashliqlar yighinigha qatnishish üchün dölitige barghan türkmenistan pirézidénti gurbanguli berdimuhemmedow bilen körüshti.
türkiye awazi radiyosi xewiri: xitay tashqi ishlar ministirliqi bayanat élan qilip, uchrishishta shi jinpingning türkmenistanning diplomatik munasiwet ornatqan 1992- yilidin buyan özara hörmet qilish we menpeet yetküzüshni yaqlighan halda hemkarliqni saqlap kelgenlikini, özining ikki döletning téximu zor hemkarliq ornitish yoshurun küchige ige ikenlikige ishinidighanliqini otturigha qoyghanliqini bildürdi.
bayanatta körsitilishiche, berdimuhemmedowning yanwar (2023)diki xitay ziyariti jeryanida, ikki döletning munasiwitini «uniwérsal istratégiyilik shériklik munasiwiti» derijisige kötürgenlikini jakarlighanliqini eskertken shi, hemkarliqni xitay we türkmenistan xelqi üchün paydiliq shekilde tereqqiy qildurushqa teyyar ikenliklirini tekitligen.
xitay bilen ottura asiyadiki besh jumhuriyetni bir yerge jem qilghan xitay - ottura asiya bashliqlar yighini tarixiy yipek yolining bashlinish nuqtisi dep qarilidighan xitayning shenshi ölkisining merkizi shiende ötküzülmekte.
xitay dölet reisi shi jinpingning sahibxanliqida chaqirilghan bashliqlar yighinigha qazaqistan jumhuriyiti pirézidénti qasim jömert toqayéw, qirghizistan pirézidénti sadir japarow, tajikistan pirézidénti imameli raxman, türkmenistan pirézidénti gurbanguli berdimuhemmedow we özbékistan pirézidénti shewket mirziyayéw qatarliqlar ishtirak qilmaqta.
