b d t: ashliq toluq yolgha qoyulushi üchün dawamliq xizmet ishleymiz
birleshken döletler teshkilati qaradéngiz ashliq yötkesh kélishimining toluq yolgha qoyulushi üchün munasiwetlik terepler bilen dawamliq hemkarlishidighanliqini bildürdi.
türkiye awazi radiyosi xewiri: birleshken döletler teshkilati bash katipining insanperwerlik ishliri yardemchisi we jiddiy ehwalgha yardem bérish maslashturghuchisi martin giriftis b d t ning qaradéngiz ashliq yötkesh paaliyetlirining dawamlishishi, ashliq kélishimining toluq yolgha qoyulushi üchün munasiwetlik terepler bilen izchil hemkarlishidighanliqini bayan qildi.
birleshken döletler teshkilatining bayanatigha qarighanda, birleshken döletler teshkilati bash katipining insanperwerlik ishliri yardemchisi we jiddiy ehwalgha yardem bérish maslashturghuchisi martin giriftis 10-maydin 11-mayghiche türkiye, rusiye we ukraina muawin dölet mudapie ministirlirining ishtirak qilishida istanbulda ötküzülgen qaradéngiz ashliq yötkesh paaliyetliri yighinida söz qilghan.
u sözide, qaradéngiz ashliq kélishimining yer shariwi ashliq bixeterliki üchün nahayiti zor ehmiyetke ige ikenlikini tekitligen. shundaqla alaqidar tereplerning teshebbuskarliqi netijiside ishqa kirishtürülgendin buyan ukrainadin 30 milyon tonnidin artuq ashliq we yémeklik mehsulatlirining bixeter éksport qilinishigha qolayliq yaritip bérilgenlikini eskertip, munasiwetlik tereplerni tebrikligen.
tolgliatti-odéssa amonyak turuba liniyesini eslige keltürüsh, kélishim mudditini uzartish, paaliyetlerni üzlüksiz dawamlashturush üchün birleshme kordinatsiye merkizini mukemmelleshtürüsh qatarliq nurghun mesililer muzakire qilinghan yighinda, martin giriftis ashliq we oghut éksportigha qoshqan muhim töhpiliri üchün rusiyege minnetdarliq bildürgen.
giriftis birleshken döletler teshkilatining qaradéngiz ashliq yötkesh paaliyetlirini dawamlashturush we ashliq kélishimini toluq yolgha qoyush üchün herqaysi terepler bilen dawamliq yéqindin hemkarlishidighanliqini tekitligen.
ukraina milletler, rayonlar we ul eslihe tereqqiyati ministiri aléksandir kubrakow ammiwi ortaqlishish tor bétidiki sehipiside élan qilghan bayanatida, qaradéngiz ashliq yötkesh kélishimining mudditini uzartish üchün tirishiwatqanliqlirini bayan qildi.
kubrakow birleshken döletler teshkilati bilen türkiyening muzakirilerni torda dawamlashturush toghriliq teklip sunghanliqini tekitlep mundaq dédi: «ukraina heyiti ashliq kélishimining mudditini uzartishning muhimliqini ilgiri sürmekte hemde kéchiktürmestin paraxotlarni tizimlash we tekshürüsh xizmitini dawamlashturushning zörürlükini tekitlimekte.»
