türkiye - süriye munasiwetlirini ilgiri sürüshning yol xeritisi teyyarlinidu

türkiye awazi radiyosi xewiri: tashqi ishlar ministirliri rusiyening paytexti moskwada chaqirilghan töt terep yighinidin kéyin birleshme bayanat élan qildi.

türkiye jumhuriyiti tashqi ishlar ministiri mewlüt chawushoghlu, rusiye tashqi ishlar ministiri sérgéy lawrow, iran tashqi ishlar ministiri hüseyin emir abdullahiyan we süriye tashqi ishlar ministiri faysal miqdad ishtirak qilghan yighinda, ministirlarning türkiye bilen süriyening döletler ara munasiwitini janlandurushqa munasiwetlik mesililerni her jehettin ochuq mulahize qilghanliqi otturigha qoyulghan bayanatta: «ishtirakchilar b d t xewpsizlik kéngishining 2254- nomurluq höjjiti bilen <astane formati> yighinliri dairiside élan qilinghan resmiy bayanatlargha asasen, süriyening igilik hoquqi, zémin pütünlüki we térrorizmning barliq shekil we ipadilirige qarshi küresh qilishta ching turidighanliqlirini jezmleshtürdi.

süriyeliklerning öz wetinige ixtiyari, bixeter we izzet-hörmiti saqlanghan halda qaytip kétishlirige kapaletlik qilish we  toqunushtin kéyinki qayta qurushqa qolayliq yaritish ishlirida süriyege bérilidighan xelqara yardemni kücheytishning ehmiyiti tekitlendi.

ishtiraktchilar yene, türkiye – süriye munasiwetlirini ilgiri sürüsh üchün,  tashqi ishlar ministirliqlirining muawin ministirliri bilen töt döletning dölet mudapie ministirliqi we istixbarat tarmaqlirining özara masliship yol xeritisi teyyarlishi toghrisida yolyoruq chüshürüsh qarar qilindi» dégen ibarilerge orun bérildi.

bayanatta, ministirlarning yighindiki pikir almashturushining «ijabiy we berpachi keypiyat» ichide ötkenliki, ministirlarning yene aldimizdiki mezgillerdimu hazirqi töt terep yighini sheklidiki yuqiri qatlamliq alaqe we téxnikiliq söhbetlerni dawamlashturush toghrisida birdeklik hasil qilinghanliqigha isharet qilindi.