florida ishtati xitaylarning yer sétiwélishini cheklidi

türkiye awazi radiyosi xewiri: florida waliy mehkimiisning bayanatida bildürülishiche, jumhuriyetchiler partiyesidin 2024-yili ötküzülidighan pirézidént saylimigha kandidatliqini élan qilidighanliqi mölcherlengen waliy ron désantis (Ron DeSantis) xitay kommunistik partiyesining «jasusluq we dölet bixeterlikige tehdit shekillendürgenliki» ni ilgiri sürgen bezi paaliyetlirige qarshi bir yürüsh qanun teklip layihesini testiqlighan.

waliy désantis bu ramkida, amérika puqrasi yaki daimliq turush kénishkisi bolmighan ehwalda, xitaylarning we xitay kompartiyesi bilen munasiwiti bar kishi yaki idare-organlarning floridadin térilghu yer sétiwélishini chekligen qanun teklip layihesini imzalidi.

u xitaylarning amérikadin térilghu yer sétiwélishni xalaydighanliqini ilgiri sürüp: «yémek-ichmek bixeterliki, dölet bixeterlikidur» dédi we déhqanchiliq yerlirini chet elliklerge ötküzüp bérishke cheklime qoyghanliqlirini tekitlidi.

mezkur qanun layihesi bilen, xitaylarning floridadiki amérika herbiy bazilirigha yéqin rayonlardin melum kölemde yer sétiwélishi cheklinidu. rusiye , kuba , iran , süriye we wénézuéla puqraliriningmu herbiy bazigha yéqin jaydin mal-mülük sétiwélishi meni qilinidu.

u yene, uniwérsitét we mekteplerning dölet maarip kéngishining testiqini almay turup, chet el maarip organlirining yardem meblighini qobul qilishini chekleydighan qanun layihesinimu imzalidi. bu arqiliq xitay idare-organlirining florida ishtatidiki maarip organlirigha tesir körsitishning aldini élish meqset qilindi.

u tiktokning hökümet we maarip organlirida ishlitilishini chekleydighan qanun teklip layihesinimu imzalap, xitayning amérikiliqlarning sezgür dijital (reqemlik) sanliq melumatlirigha érishishni toxtitish üchün bu tedbirlerni alghanliqlirini bildürdi.

nurghun amérikaliq xitaylar özlirige qarshi ayrimichiliqqa seweb bolushi mumkinlikini ilgiri sürüp, florida ishtatining mezkur qararlirigha naraziliq bildürdi.