borrél: teywen yawropa üchün muhim

türkiye awazi radiyosi xewiri: yawropa ittipaqi tashqi munasiwetler we xewpsizlik siyasetliri ali wekili josép borrél yawropa parlaménti omumiy kéngishide ötküzülgen xitay bilen bolghan munasiwetler toghrisidiki yighinda söz qildi.

yawropa ittipaqi komitétining reisi ursula won dér léyénning firansiye pirézidénti émanuél makron bilen birla waqitta élip barghan mushu ayning béshidiki xitay ziyaritige qatnishish pilanini kowid – 19 din yuqumlinip qélish seweblik emelge ashuralmighanliqini eslitip ötken borrél, u yerde bermekchi bolghan signalining «xitaygha qaritilghan istratégiyemiz choqum qimmet - qarash, iqtisadiy bixeterlik, teywen we ukrainadin ibaret töt sözni asas qilishi kérek» dégendin ibaret ikenlikini eskertti.

u teywen heqqide toxtilip: «teywen üch sewebtin yawropa üchün intayin muhim. u dunyaning, bolupmu sodimizning eng istratégiyelik boghuzi. biz erkin tijaret paaliyetliri we paraxot etretlirimiz bilen u yerde bolushimiz kérek. ikkinchidin, teywenge qarshi küch ishlitilishige peqet exlaqiy sewebtinla emes, belki teywenning eng ilghar yérim ötküzgüchlerni ishlepchiqirishtiki istratégiyelik rolini nezerde tutup qarshi chiqishimiz kérek. axirida, eger biz bir jughrapiyelik siyasiy küchke aylinishni xalaydighan bolsaq, dunyaning her qaysi jaylirida meydanimizni qaytidin tekitlishimiz, menpeetimizni qoghdishimiz, tinchliqni teshebbus qilishimiz we ighwagerchilikning aldini élishimiz kérek» dédi.

borrél mesilini eng yaxshi hel qilish charisining ilgiriki haletke qaytish ikenlikini tekitlep: «teywen tinchliqni kapaletlendürüsh, otqa yagh chachmastin menpeetimizni qoghdashtiki jughrapiyewi istratégiyelik muhitimizning bir qismi. men barliq yawropa döletlirining bu qarashta ikenlikige ishinimen» dégenlerni qeyt qildi.