америка пуқраси икки хитай бейҗиңға җасуслуқ қилиш билән әйиблинип тутқун қилинди
америка қошма иштатлириниң нйуйорк иштатида хитайниң «илғар қаравулханиси» сүпитидә хизмәт қиливатқан бир ишханидики икки киши назарәт астиға елинди.
түркийә авази радийоси хәвири: америка әдлийә министирлиқи билән америка федератсийә тәкшүрүш идариси (FBI) әмәлдарлири бруклин федератсийә сот мәһкимисидә мухбирларни күтүвелиш йиғини өткүзүп, манхаттан арилиниң җәнубидики «хитай базири» райониға йеқин йәрдә хитай һөкүмитигә вакалитән деңиз һалқиған қаравулханидәкла паалийәт елип бериватқан бир ишханиға бастуруп кирип тәкшүрүш елип берилғанлиқини, бастуруп кириш җәрйанида «дәлил – испатларни йоқитивәткән» америка пуқраси икки хитай әрниң назарәт астиға елинғанлиқини уқтурди.
алақидар тармақларниң билдүрүшичә, қанунсиз алақилишиш ишханисида хитай җамаәт хәвпсизлики министирлиқини учур билән тәминлигәнлики илгири сүрүлгән мәзкур икки кишиниң бири бронкиста йашайдиған 61 йашлиқ лу җйәнваң, йәнә бири манхаттанда туридиғанлиқи ениқланған 59 йашлиқ чен җинпиң икән.
икки хитайниң турғузулған делоға асасән бүгүн әтигән нйуйорктики өйлиридин назарәт астиға елинғанлиқини билдүргән даириләр, у иккисиниң алдимиздики саәтләрдә бруклиндики америка сотчиси роман е. рейес тәрипидин сотлинидиғанлиқини қәйт қилди.
америка әдлийә министирлиқиниң тор бетидики байанаттиму лу вә чен фамилилик икки әрниң хитай һөкүмитиниң җасуслири сүпитидә һәрикәт қилиш вә хитай җамаәт хәвпсизлики министирлиқи әмәлдари билән орнатқан алақисигә мунасивәтлик пакитларни йоқитип, адаләткә тосқунлуқ қилиш билән әйибләнгәнлики билдүрүлди.
