kirby rusiye, israiliye we iran heqqidiki soallargha jawab berdi

türkiye awazi radiyosi xewiri: aqsaray (amérika) dölet bixeterlik kéngishining istratégiyelik alaqe maslashturghuchisi jon kirbi, washingtonning rusiye pirézidénti wiladimir putinning bélarusiyege taktikiliq yadro qorallirini orunlashturush qararigha munasiwetlik özgirishlerni yéqindin közitishni dawamlashturidighanliqini bildürdi.

aqsaray (amérika) dölet bixeterlik kéngishining istratégiyelik alaqe maslashturghuchisi jon kirbi muxbirlarni kütüwélish tor yighini ötküzüp, soallargha jawab berdi.

rusiye pirézidénti putinning bélarusiyege taktikiliq yadro qorallirini orunlashturush qarari toghrisida toxtalghan kirbi, moskwaning keng kölemlik qirghuchi qorallar yaki yadro qorallirini ishlitishni qarar qilghanliqigha ait héchqandaq alametning yoqluqini tilgha élip: «özgirishlerni yéqindin közitishni dawamlashturimiz. hazirghiche yadro qoralliridin yaltaytishqa munasiwetlik istratégiyelik pozitsiyemizni özgertishimizni teqezza qilidighan herqandaq bir nerse körmiduq» dédi.

u amérikaning israiliyede siyasiy kirizis keltürüp chiqarghan «edliye islahati» sewebidin yüz bergen weqelerdin «qattiq endishe qiliwatqanliqi»ni tilgha élip, washingtonning özgirishlerge yéqindin diqqet qilish bilen birge tereplerni ortaq tonush hasil qilishqa chaqirghanliqini eskertti.

kirbi amérika pirézidénti jo baydinningmu israiliye bash ministiri bényamin nétanyahugha «nahayiti ochuq- ashkara» halda endishisini ipadilep, démokratik tüzümdiki tüp özgirishlerning ortaq tonushni asas qilishi kéreklikini otturigha qoyghanliqini bildürdi.

jon kirbi baydinning israiliyede ichki urush chiqip qélshidin ensirimeydighanliqini éytti.

u rusiye bilen iranning tor hujumi saheside hemkarliqni tereqqiy qildurushni pilanlawatqanliqi toghrisidiki xewerlerge munasiwetlik bir soalgha jawab bérip, bu xewerlerning kishini chöchütidighanliqini bildürdi.

kirbi yéqindin buyan ikki dölet mudapie hemkarliqining chongqurlishishqa yüzlengenlikini, washingtonning bu dairide tor hujumi hemkarliqidiki tereqqiyatlarnimu tekshüridighanliqini qeyt qildi.

u yene yéqinqi 36 saet ichide iranning qollishi astidiki xelq qoralliqlirining amérikaning süriyediki orunlirigha hujum qilmighanliqini jezmleshtürdi.

amérikaning süriyediki mewjutluqida héchqandaq özgirish bolmighanliqini bildürgen kirbi, amérikaning daésh térrorluq teshkilatigha qarshi küresh qilishni dawamlashturidighanliqini sözlirige ilawe qildi.