b d t rusiyening bélarusiyege yadro qorali orunlashturush pilanigha inkas qayturdi

türkiye awazi radiyosi xewiri: birleshken döletler teshkilati (b d t) bayanatchisi rusiyening bélarusiyege taktikiliq yadro qorallirini orunlashturush pilani toghrisida toxtilip, barliq eza döletlerning yadro qorallirining kéngiyishining aldini élish shertnamisige emel qilishi kéreklikini tekitlidi.

b d t bash katipining bayanatchisi istéfan dujarrik kündilik muxbirlarni kütüwélish yighinida söz qilip, yadro qorallirigha alaqidar jiddiychiliklerning küchiyip kétishining kishini endishige salidighanliqini éytti.

u yadro xewpining intayin yuqiri ikenlikige isharet qilghan halda, jiddiychilikni uyghaytiwétidighan her xil xata chot yaki heriketlerdin saqlinish kéreklikini tilgha élip: «barliq eza döletler yadro qorallirining kéngiyip kétishining aldini élish shertnamisige emel qilishi kérek. ular shertnamining mesuliyet we mejburiyitini ada qilishi lazim» dédi.

dujarrik ukrainaning b d t xewpsizlik kéngishining jiddiy yighin chaqirishi heqqidiki telipi toghrisida toxtilip, yighinning bu hepte ichide échilidighanliqini bildürdi.

rusiye pirézidénti wiladimir putin 25- mart moskwaning bélarusiyege taktikiliq yadro qorallirini orunlashturidighanliqini bildürüp: «biz buni yadro qorallirining kéngiyip kétishining aldini élish toghrisidiki xelqaraliq mejburiyitimizge xilapliq qilmastin orunlashturimiz» dégenidi.

shimaliy atlantik ehdi teshkilati – nato bilen yawropa ittipaqi rusiyening bu qararigha «mesuliyetsizlik» dep baha bergenidi.

ukraina tashqi ishlar ministirliqimu bu témini muzakire qilish üchün, b d t xewpsizlik kéngishining pewquladde yighin chaqirishini telep qilghanidi.