بايدىن: رۇسىيە - خىتاي يېقىنلىشىشى كۆپتۈرۈلدى

تۈركىيە ئاۋازى رادىيوسى خەۋىرى: ئامېرىكا پىرېزىدېنتى جو بايدىن خىتاي بىلەن رۇسىيەنىڭ يېقىنلىشىشىنىڭ يېقىندىن بۇيان «بەكلا مۇبالىغىلەشتۈرۈلگەن»لىكىنى ئىلگىرى سۈرۈپ، ئەمەلىيەتتە غەرب ئىتتىپاقىنىڭ بىر – بىرىگە تېخىمۇ يېقىنلىشىۋاتقانلىقىنى ئوتتۇرىغا قويدى.

كانادادا دۆلەت ئىشلىرى زىيارىتىدە بولۇۋاتقان ئامېرىكا پىرېزىدېنتى بايدىن كانادانىڭ ئوتتاۋا شەھىرىدە كانادا باش مىنىستىرى جاستىن ترۇدو بىلەن قوشما مۇخبىرلارنى كۈتۈۋېلىش يىغىنى ئۆتكۈزدى.

پىرېزىدېنت بايدىن رۇسىيەنىڭ ئۇكرائىناغا قىلىۋاتقان ھۇجۇمىنى توختىتىش ئۈچۈن موسكۋاغا ئىشلىتىلىۋاتقان بېسىم ۋە  ئۇكرائىناغا قىلىنىۋاتقان ياردەمنىڭ داۋام قىلىدىغانلىقىنى بىلدۈردى.

يېقىنقى 10 يىلدا خىتاي بىلەن رۇسىيە ئوتتۇرىسىدا 40 قېتىم يىغىن ئۆتكۈزۈلگەنلىكىنى بىلدۈرگەن بايدىن، يەنە بىر تەرەپتىن، غەرب ئىتتىپاقىنىڭ تېخىمۇ يېقىنلاشقانلىقىنى تەكىتلىگەندىن كېيىن، سۆزىنى داۋاملاشتۇرۇپ: «مەن خىتاي بىلەن رۇسىيەنى تۆۋەن مۆلچەرلىمەيمەن. ئەمما، مېنىڭچە بىز بەك كۆپتۈرۈۋەتتۇق. يېقىنقى ئۈچ ئايدىن بۇيان خىتاينىڭ رۇسىيەنى مۇھىم قوراللار بىلەن تەمىنلىيەلەيدىغانلىقى ئوتتۇرىغا قويۇلۇۋاتىدۇ. ئۇلار تېخى بۇنى قىلىپ باقمىدى. بۇ ئۇلارنىڭ ھەرگىز ئۇنداق قىلمايدىغانلىقىنى كۆرسەتمەيدۇ، ئەمما تېخى ئۇنداق قىلمىدى. شۇنداق بولغان تەقدىردىمۇ، بۇ ئىش غەربنى تېخىمۇ كۆرۈنەرلىك دەرىجىدە بىرلەشتۈردى» دېگەنلەرنى قەيت قىلدى.