испанийәдики мусулманлар 10 һәссә көпәйгән
испанийәдә йашайдиған мусулманлар йеқинқи 30 йилда 10 һәссә көпәйди.
түркийә авази радийоси хәвири: испанийә ислам комитетиниң катипи муһәммәд аҗана анадолу агентлиқиға рамизан мунасивити билән испанийәдики мусулманларниң омумий турмуши вә дуч кәлгән мәсилиләр һәққидә мәлумат бәрди.
у: «йеқинқи 30 йилда испанийәдики мусулманларниң сани 10 һәссә көпәйди. һөкүмәт мәнбәлиригә қариғанда , 2 милйон 500 миң , рәсмий болмиған санлиқ мәлуматқа қариғанда, тәхминән 3 милйон мусулман йашайду. бу дөләттики мусулманларниң 1 милйондин көпрәки испанийә пуқраси, уларниң бәзилири көчмән, йәнә бир қисминиң йилтизи йәрлик испан» деди.
у маракәш, пакистан, баңладиш, сенегал вә алҗирийәдин кәлгән мусулманларниң көп санни игиләйдиғанлиқини билдүрүп, көпинчисиниң каталонийә, валенсийә, ендулус вә мадрид қатарлиқ санаәтләшкән районларда йашайдғанлиқини әскәртти.
у рамизанниң испанийәдики мусулманлар шундақла дунйадики барлиқ мусулманлар үчүн алаһидә бир ай икәнликини көрситип, бир қанчә йил илгири мусулманлар әң мәркәзләшкән сеута вә мелиллада йолға қойулған роза һейт вә қурбан һейтта бир күн рәсмий дәм елишни, қалған районларда йашайдиған мусулманлар үчүнму йолға қойулушини тәләп қилидиғанлиқлирини қәйт қилди.
у мусулманларниң иҗтимаий вә қануний һоқуқлириниң 1992-йили дөләттә имзаланған һәмкарлиқ келишими билән капаләткә игә қилинған болсиму, һәл қилишни күтүватқан нурғун мәсилиләрниң барлиқини тәкитлиди.
у мусулманларға өчмәнлик қилиш мәсилисидә, испанийә вәзийитиниң йавропадики башқа дөләтләргә селиштурғанда көп йахши икәнликини әскәртип: «гәрчә шундақ болсиму, һәр вақит еһтийатчан болуп, өчмәнликтин сақлиниш керәк» деди.
