xelqara pul fondi teshkilati bilen ukraina iqtisadiy kélishim tüzdi
2022-yili 24-féwraldin tartip rusiyening tajawuzchiliqigha qarshi urush qiliwatqan ukraina xelqara pul fondi teshkilati (IMF) bilen texminen 15 milyard 600 milyon dollarliq meblegh yürüshtürüsh kélishimi tüzdi.
türkiye awazi radiyosi xewiri: xelqara pul fondi teshkilati élan qilghan bayanatida, teshkilat wekiller heyiti we ukraina dairilirining pul-muamile ishlirining muqimliqi we iqtisadning eslige kélishini qollashni öz ichige alghan 48 ayliq meblegh bilen teminlesh toghrisida téxnikiliq sewiyede pikir birliki hasil qilghanliqi bildürüldi.
bayanatta, ukraina dairilirining telipige binaen gawin grey (GavinGray) bashchiliqidiki xelqara pul fondi teshkilati wekiller heyitining 8-marttin 15-mart künliri polsha paytexti warashawada ukraina dairiliri bilen töt yilliq iqtisadiy pirogramma toghrisida söhbetleshkenliki xatirilitildi.
meblegh yürüshtürüsh sommisining texminen 15 milyard 600 milyon dollar ikenliki bildürülgen bayanatta, tilgha élinghan iqtisadiy pirogrammining xelqara pul fondi teshkilati ijraiye mudiriyitining testiqidin ötküzülidighanliqi we mudiriyetning kelgüsi bir nechche hepte ichide bahalishidin ümid barliqi qeyt qilindi.
amérika maliye ministiri janét yélén (Janet Yellen) ukraina bilen xelqara pul fondi teshkilati otturisida hasil qilinghan yéngi iqtisadiy pirogramma heqqide tüzülgen kélishim toghrisida yazma bayanat élan qildi.
u muwapiq halda shert qoyulghan xelqara pul fondi teshkilati pirogrammisining, bashqurushni kücheytish, chiriklik xewpige taqabil turush we zörür iqtisadiy yardem bilen teminleshni öz ichige alghan ukrainaning islahat tirishchanliqini qollashta intayin muhimliqini tekitlep, amérika bilen uning shérikliri teminligen iqtisadiy yardemnimu qollaydighanliqlirini qeyt qildi.
