пирезидент байдин вухән вируси тоғрисидики қанун лайиһәсини имзалиди

түркийә авази радийоси хәвири: америка пирезиденти җо байдин март ейиниң бешида җумһурийәтчиләр билән демократлар конгрәдә аваз бирлики билән қобул қилған вухән вирусиниң йилтизиға мунасивәтлик учурларниң мәхпийтликини әмәлдин қалдуридиған «вухән вирусиниң йилтизи қануни» намлиқ қанун лайиһәсини имзалиди.

пирезидент җо байдинниң йазма байанатида, «кәлгүсидики вабаларниң алдини техиму йахши елишимиз үчүн вухән вирусиниң йилтизини тәтқиқ қилишимиз керәк. хитайдики вухән вирус иниститутидики йошурун йип учлирини өз ичигә алған һалда, вухән вирусиниң барлиқ мәхпий учурлирини тәтқиқ қилиш давамлишиду» дейилди.

мәзкур қанун, америка дөләт истихбарат идарисини вухән вабаси тарқилиштин илгири вухән вирус иниститутида қилинған вухән вируси тәтқиқатлирини йаки башқа мунасивәтлик паалийәтләрни тәтқиқ қилишқа йүзләндүриду.

конгрәдә җумһурийәтчиләр қанити ваба тарқалғандин тартип 1 милйондин артуқ америкалиқниң өлүмигә сәвәб болған вухән вирусиниң, хитайниң вухән шәһиридики бир тәҗрибиханидин чиққанлиқини илгири сүриду. һөкүмәт мәсуллири болса, вирусниң тәҗрибиханидин тарқалғанлиқи йаки һайванлардин йуққанлиқиға қарита тәмкинлик билән муамилә қилмақта.