amérika p k k / y p g térrorchilirigha tik uchar heydeshni meshiq qilduruwatamdu?

türkiye awazi radiyosi xewiri: amérika dölet mudapie ministirliqi bayanatchisi birigada komandiri général patrik raydér amérika armiyesining süriyede SDG dégen namni ishlitip paaliyet élip bériwatqan p k k / y p g térrorluq teshkilati ezalirigha tik ucharlarni ishlitishni meshiq qildurup – qildurmighanliqi toghrisidiki soalgha «bilishimche, yaq (yeni undaq ish yoq)» dep jawab berdi.

iraqning shimalida p k k térrorchiliri olturghan bir tik uchar ayropilan chüshüp ketkendin kéyin, tik ucharning térrorluq teshkilatining qoligha qandaq chüshkenlikige munasiwetlik mesile qiziq nuqtigha aylanghan. alaqidar tereplerning diqqiti teshkilatning süriyediki qanitini meshiq qildurush bilen birge qoral – yaraghlar bilen teminlewatqan amérika qoshma ishtatlirigha merkezleshkenidi.

amérika dölet mudapie ministirliqi bayanatchisi patrik raydér anadolu agéntliqi muxbirining iraqta p k k térrorchiliri olturghan bir tik ucharning chüshüp ketkenlikini eskertken halda: «siler süriyediki SDG gha tik uchar heydeshni meshiq qilduruwatamsiler?» dégen soaligha jawab bérip: «bilishimche, yaq» dep jawab berdi.

iraq kürt (kord) rayonluq hökümiti qarmiqidiki térrorluqqa qarshi turush qisimliri féysbuktiki resmiy adréisda tünügün (15-mart) duxokning chemanke nahiyeside chüshüp ketken tik uchar toghrisida bayanat élan qilip: «bixeterlik qisimliri tik uchargha munasiwetlik tekshürüshlirini bashlidi. deslepki tekshürüsh netijisi tik ucharning Eurocopter AS350 tipliq ayropilan ikenlikini, qaza qilghanlarning bezilirining p k k térrorchiliri ikenlikini körsitip berdi. tik ucharning kimge tewe ikenlikini éniqlash yolidiki tepsiliy tekshürüshler dawamlashmaqta» dégenlerni qeyt qilghanidi.

türkiye jumhuriyiti dölet mudapie ministirliqi tünügün bayanat élan qilip, bir qisim ijtimaiy taratqu supilirida tarqalghan «iraqning shimalida türkiye armiyesining bir tik uchari chüshüp ketti» dégen uchurlarning ösek sözlerdin ibaret ikenlikini, uning réalliq bilen héchqandaq alaqisining yoqluqini élan qilghanidi.