amérika: türkiye – misir munasiwetlirining yaxshilinishini teshwiq qiliwatimiz

türkiye awazi radiyosi xewiri: amérika qoshma ishtatliri tashqi ishlar ministirliqi bayanatchisi néd prays kündilik muxbirlarni kütüwélish yighinida, misir tashqi ishlar ministiri samih shükrining tünügünki türkiye ziyariti heqqide toxtalghanda, her ikki döletning amérika qoshma ishtatlirining muhim shérikliri ikenlikini, shu wejidin, türkiye – misir munasiwetlirining yaxshilinishini herdaim teshwiq qiiwatqanliqlirini tekitlep mundaq dédi: «türkiyemu, misirmu bizning muhim shériklirimizdur. shunga, muhim shériklirimiz otturisidiki munasiwetlerning yaxshilinishini herdaim teshwiq qiliwatimiz.»

tashqi ishlar ministiri mewlüt chawushoghlu aridin 10 yil ötkendin kéyin türkiyege ziyaretke kelgen misir diplomatiye ministiri samih shükrini adana ayrodurumida qarshi alghanidi.

ikki ministir 6 – féwral küni yüz bergen yer tewresh apitide talapetke uchrighanlar üchün insanperwerlik yardem buyumliri qachilanghan «elhurriyye» namliq paraxot lenger tashlighan mersin xelqara portida bayanat élan qilghanidi.

chawushoghlu misir – türkiye munasiwetliride yéngi sehipe échilghanliqini, jumhur reis rejep tayyip erdoghan bilen misir pirézidénti abdulfettah essisining bultur noyabirda dohada körüshüshiningmu nahayiti zor ehmiyetke ige ikenlikini qeyt qilghanidi, hemde misir tashqi ishlar ministiri shükri bilenmu ikki dölet otturisidiki munasiwetlerni tereqqiy qildurush yolida tashlinidighan qedemler heqqide muzakire élip barghanliqlirini bildürgenidi.

misir diplomatiye ministiri shükri bolsa, misir – türkiye otturisidiki munasiwetlerni tekrar eslige keltürüsh we her ikki döletning ortaq menpeetlirige uyghun shekilde téximu qudret tapquzushqa nahayiti zor ehmiyet bériwatqanliqlirini eskertip mundaq dégenidi: «misir herdaim türkiyediki qérindashlirining yénidin orun alidu. munasiwetlirimizning bundin kéyin eng yaxshi sewiyege yétidighanliqigha chin dilimdin ishinimen.»