косову билән сербийә бир – бириниң мустәқиллиқини етирап қилишқа тиришидиған болди

түркийә авази радийоси хәвири: сербийә пирезиденти александер вуҗиҗ вә косову баш министири албин курти боррел билән белгийәниң пайтәхти бирйусселда өткүзүлгән үч тәрәп йиғинида айрим-айрим учришиш өткүзди.

боррел учришиштин кейин ахбаратларға бәргән байанатида, муһим илгириләшләрниң қолға кәлгәнликини билдүрүп: «шуниң билән бир вақитта йәнә, бүгүн тәрәпләр мақуллиған ишларни иҗра қилиш үчүн техиму көп хизмәт қилишқа еһтийаҗлиқмиз» деди.

алий вәкил боррел, «келишим һасил қилиш наһайити муһим, бирликкә кәлгәнни иҗра қилиш техиму муһим» дегәнни алаһидә тәкитлиди.

рәһбәрләр пиринсип җәһәттин келишкән бу пиланниң йавропа иттипақиға әза 27 дөләт тәрипидин қобул қилинғанлиқини билдүргән боррел, бу пиланға мунасивәтлик тәклипниң сентәбирдә (2022) оттуриға қойулғанлиқини, шуниңдин кейин қойуқ дипломатик учришишларниң елип берилғанлиқини ейтти.

боррел келишимниң косову билән сербийә оттурисида хәлқләрниң кимлик йаки аптомобил номур тахтисини ишлитип әркин сайаһәт қилиш имканийитигә игә қилидиғанлиқини, шуниң билән бир вақитта, сода мунасивити вә мәбләғ селишни асанлаштуридиғанлиқини байан қилди.

боррел һәр икки тәрәпниңму йавропа иттипақиниң маслаштуруши сиртида, зиддийәтниң қайтидин кәскинлишишини кәлтүрүп чиқиридиған һәр қандақ һәрикәттин өзини қачурушқа қошулғанлиқиниң иҗабий тәрәққийат икәнликини тәкитлиди.

боррел рәһбәрләрниң келәр айниң оттурилирида йәнә бир қетим учришиш өткүзидиғанлиқини елан қилди.

сербийә 2008-йили өз алдиға мустәқиллиқини җакарлиған косовуни өзиниң земини дәп қарап кәлмәктә.

пат-пат тоқунушуп келиватқан сербийә билән косову, йавропа иттипақиниң мурәссә қилиши билән 2011-йили башланған белград-приштинә дийалог мусаписи даирисидә, мунасивәтләрни нормаллаштурушқа вә ахирида икки дөләтниң бир- бирини етирап қилиши үчүн ортақ йол тепишқа тиришмақта.​​​