yaponiye türkiye we süriyege 27 milyon dollar yardem béridu
yaponiye qattiq yer tewreshte éghir talapetke uchrighan türkiye bilen süriyege texminen 27 milyon dollarliq muhim insanperwerlik yardimi béridu.
türkiye awazi radiyosi xewiri: 6 – féwral küni yüz bergen, «100 yildin buyanqi eng chong balayiapet» dep atalghan, türkiyening 11 wilayiti bilen süriyege éghir talapet yetküzgen, merkizi qahramanmarash bolghan 7.7 we 7.6 balliq yer tewresh apitidin kéyin, yaponiye hökümiti türkiye bilen süriyege dawamliq insanperwerlik yardem bermekte.
yaponiye ichki kabinét bash katipi xirokazu matsono türkiye we süriyege texminen 27 milyon dollar insanperwerlik yardimi bérilidighanliqini jakarlidi.
matsono bu yardemdin 16 milyon dollarliq qismining xelqaraliq teshkilatlar arqiliq bérilidighanliqi, türkiye we süriyediki yer tewreshte talapetke uchrighanlarni panahlinish orni, yémeklik we bashqa kündilik éhtiyajlar bilen teminlesh üchün seperwerlik paaliyetlirining élip bérilidighanliqini qeyt qildi.
xirokazu matsono tokyoning yaponiyediki bir ammiwi teshkilat arqiliq ikki döletke 4 milyon dollar yardem qilidighanliqini uqturdi.
u yene, tokyoning türkiye we süriyediki yer tewresh apitide weyran bolghan rayonlarni qayta qurush xizmetlirige dawamliq yardem béridighanliqinimu sözlirige ilawe qildi.
igilinishiche, yaponiye xelqaraliq bir yardem fondi arqiliq süriyege 7 milyon dollarliq insanperwerlik yardem buyumliri ewetidiken.
