байдин: натониң һәр бир ғирич земинини қәтий қоғдаймиз

түркийә авази радийоси хәвири:  америка пирезиденти җо байдин «9-бухарест» (B9) рәһбәрлири вә нато баш катипи столтенберг билән полша пайтәхти варашавада көрүшти вә мухбирларниң соаллириға җаваб бәрди.

у натониң күчлүк иттипақдашлири билән көрүшкәнликидин хушаллиқ һес қилғанлиқини вә баш катип столтенбергниң бүгүнгичә «қалтис хизмәт қилғанлиқи» ни билдүрүп, униңға тәшәккүр ейтти.

у «9-бухарест» иттипақиниң 2015-йили қурулғанлиқини хатирилитип: «бүгүн русийә ишғалийитиниң биринчи йиллиқиға йеқинлашқан бир вақитта, давамлиқ  бирликтә икәнликимизни намайан қилишимиз интайин муһим. мениңчә бу өзимизни қанчилик күчлүк һес қилидиғанлиқимизниң испати» деди.

у: натониң шәрқий тәрипидики дөләтләрниң муһимлиқини тәкитләп: «силәр коллектип мудапиәмизниң алдинқи сепидә турисләр. бу уруш украинадила әмәс, бәлки барлиқ йавропа вә дунйаниң һәрқайси җайлиридики демократик дөләтләрниң әркинлики үчүнму интайин муһим. биз украинани һалқилиқ бихәтәрлик йардәмлири вә милйонлиған мусапирларни муһим йардәмләр билән қоллаватимиз. биз украинани мәңгү қоллаймиз» деди.

у натоға бәргән вәдилирини тәкрарлашни халайдиғанлиқини әскәртип: «бәшинчи мадда муқәддәс вәдә һесаблиниду. биз натониң һәр бир ғирич земинини қәтий қоғдаймиз» деди.

нато баш катипи столтенберг русийә пирезиденти владимир путинниң тинчлиқ үчүн тәййар әмәсликини әскәртип: «дәл әксичә, у техиму көп урушқа тәййарлиқ қиливатиду. шуңа, биз давамлиқ һалда украинаға болған қоллишимизни күчәйтишимиз керәк. биз украинаға ғәлибә қилиши үчүн еһтийаҗлиқ нәрсиләрни беришимиз керәк» деди.

натониң шәрқий қанитидики дөләтләр болған булғарийә, чехийә, естонийә, венгирийә, латвийә, литванийә, полша, руменийә вә силовакийә қатарлиқ дөләтләр 2015-йили 4-нойабир руменийә пайтәхти бухарестта «9-бухарест» иттипақини қурған иди.