engliye-ukraina otturisida «london xitabnamesi» imzalandi

türkiye awazi radiyosi xewiri: engliye bilen ukraina otturisida ikki dölet munasiwetlirini kücheytishni meqset qilghan «london xitabnamesi», paytext londongha yétip kelgen ukraina pirézidénti wolodimir zélénskiy we engliye bash weziri rishi sunak teripidin imzalandi.

xitabnamede, rusiyening ukrainagha qarshi 2014- we 2022-yilliridiki tajawuzchiliqliri üchün «yawropaning xewpsizliki we kishilerning öz kélechikini yaritish hoquqigha hujum qiliwatidu. erkinlikimizge tehdit séliwatidu» déyildi.

rusiyege qarshi engliye bilen ukrainaning zich ittipaqlishidighanliqi tekitlengen xitabnamede, londonning kiyéwning musteqilliqi, zémin pütünlüki we chégrasini qetiy tewrenmey qollaydighanliqi otturigha qoyuldi.

xitabnamede, ukrainaning özining bixeterlikni, jümlidin shimaliy atlantik ehdi teshkilati-natogha eza bolushini qollaydighanliqi tekitlendi we munular déyildi:

«ukraina qoralliq qisimliri özining zémininila emes, belki bizning ortaq qimmet qarishimizni we xelqara qanunning asasiy pirinsiplirini teshkil qilidighan b d t nizamnamesinimu qoghdimaqta. döletlirimiz rusiyening <tesir dairisi> teshebbusini we chégrani zorluq bilen özgertish qedemlirini ret qilidu. biz igilik hoquqi we öz teqdirini özi belgileshtek qimmet qarishini qoghdaymiz. biz rusiye sadir qilghan wehshiylikning qayta yüz bermeslikige kapaletlik qilish iradisige ige.»

xitabnamede, ukrainani herbiy jehettin qollashning dawam qilidighanliqi we engiliyening rusiyege qaratqan émbargo yürgüzüshni dawamlashturidighanliqi tekitlendi.

xitabnamede, «ukrainaning igilik hoquqini kapaletke ige qilmay turup, yawropaning bixeterlikini kapaletke ige qilghili bolmaydu» déyildi we engliyening zélénskiy otturigha qoyghan tinchliq pilaninimu qarshi alidighanliqi qeyt qilindi.

xitabnamede, 21-22-iyun künliri londonda ukrainaning qaytidin qurulushi mesilisi muzakire qilinidighan konféransning ötküzülidighanliqi eskertildi.