ياۋروپادىن كەلگەن قۇتقۇزۇش خادىملىرىنىڭ سانى 1500 گە يېقىنلاشتى

تۈركىيە ئاۋازى رادىيوسى خەۋىرى: ياۋروپا ئىتتىپاقى كومىتېتى قاھرامانماراشنىڭ پازارجىك ۋە ئەلبىستان ناھىيەلىرىدە يۈز بېرىپ 10 ۋىلايەتكە تەسىر كۆرسەتكەن 7.7 ۋە 7.6 بال يەر تەۋرەش سەۋەبىدىن، ياۋروپا ئىتتىپاقى پۇقرالارنى قوغداش مېخانىزمى دائىرىسىدە تۈركىيەگە ئەۋەتىلگەن گۇرۇپپىلارغا مۇناسىۋەتلىك ئۇچۇرلارنى يېڭىلىدى.

يېڭى ئۇچۇرلارغا ئاساسلانغاندا، ياۋروپا ئىتتىپاقىدىكى 20 دۆلەت ھازىرغا قەدەر 29 ئىزدەش-قۇتقۇزۇش ئەترىتى ۋە بەش داۋالاش ئەترىتىنى تۈركىيەگە ئەۋەتكەن بولۇپ، بۇلارنىڭ جەمئىي سانى 1485 ئادەم ۋە 100 ئىزدەش-قۇتقۇزۇش ئاپشاركىسىدىن تەركىب تاپىدىكەن.

بەزى ئەترەتلەرنىڭ تۈركىيەگە يېتىپ بېرىپ، ئاپەت رايونىدىكى خىزمەتلىرىنى باشلىۋەتكەنلىكى بىلدۈرۈلدى. يەنە، ياۋروپا ئىتتىپاقىنىڭ ئىزدەش- قۇتقۇزۇش ۋە داۋالاش ئەترەتلىرىدىن باشقا، چېدىر، ئەدىيال ۋە ئىسسىتقۇچ قاتارلىق ماتېرىياللارنى ئەۋەتىدىغانلىقى؛ گېرمانىيە، لىتۋانىيە ۋە سلوۋېنىيەنىڭ بۇ ماتېرىياللارنى تەمىنلەش ئۈچۈن تىرىشىۋاتقانلىقى قەيت قىلىندى.