amérika xitayning yene bir «jasus shari»ning bayqalghanliqini bildürdi

türkiye awazi radiyosi xewiri: péntagon bayanatchisi, birigada komandiri patrik raydér bayanat bérip: «biz latin amérikasi asminidin uchup ötüwatqan shargha munasiwetlik xewerlerni körduq. biz buni xitayning yene bir közitish shari dep qarawatimiz. nöwette qolimizda buningdin bashqa uchur yoq» dédi.

péntagon bir nechche kün ilgiri amérika hawa boshluqida xitayning alahide égizliktin közitish sharini bayqighanliqini, sharning amérika chégraliri ichide 60 ming ingliz chisi égizlikte uchuwatqanliqini, sharning xelq awiyatsiyesi yaki quruqluqqa maddiy xewp élip kelmigenlikini élan qilghanidi.

közitish shari bayqalghandin kéyin, amérika tashqi ishlar ministiri antoniy blinkén kéler hepte ishqa ashurushni pilanlawatqan béyjing ziyaritini kéchiktürdi we bu qarargha izahat bérip: «aldi bilen, hawa boshluqimizda — amérika asminida közitish shari uchurush bizning igilik hoquqimizning we xelqara qanunning ochuq-ashkara depsende qilinishi bolup, buni qobul qilishqa bolmaydighanliqini xitaygha bildürduq» dédi.

shar kirizisining ikki terep munasiwiti we ikki dölet xelqi ortaq köngül bölidighan nurghun mesililer muzakire qilinidighan béyjing ziyaritining meqsitige buzghunchiliq qilghanliqini eskertken ministir antoniy blinkén: «méningche, hawa boshluqi bu shekilde dexlige uchrighan her qandaq bir dölet mushu shekilde inkas qayturidu. eger bu ish xitayda yüz bergen bolsa idi, bildürülidighan inkasning qandaq bolidighanliqini men tesewwur qilalaymen» dégenlerni qeyt qildi.

xitay kommunistik partiyesi tashqi munasiwetler diréktori wang yi bilen téléfonda sözleshkenlikini bildürgen ministir blinkén : «bu bir mesuliyetsiz heriket bolup, xitayning del méning ziyaritimdin ilgirila bu qedemni tashlashqa qarar qilishi, biz ötküzüshni pilanlawatqan keng dairilik söhbetlerge ziyan yetküzdi» dédi.