америка хитайниң йәнә бир «җасус шари»ниң байқалғанлиқини билдүрди

түркийә авази радийоси хәвири: пентагон байанатчиси, биригада командири патрик райдер байанат берип: «биз латин америкаси асминидин учуп өтүватқан шарға мунасивәтлик хәвәрләрни көрдуқ. биз буни хитайниң йәнә бир көзитиш шари дәп қараватимиз. нөвәттә қолимизда буниңдин башқа учур йоқ» деди.

пентагон бир нәччә күн илгири америка һава бошлуқида хитайниң алаһидә егизликтин көзитиш шарини байқиғанлиқини, шарниң америка чегралири ичидә 60 миң инглиз чиси егизликтә учуватқанлиқини, шарниң хәлқ авийатсийәси йаки қуруқлуққа маддий хәвп елип кәлмигәнликини елан қилғаниди.

көзитиш шари байқалғандин кейин, америка ташқи ишлар министири антоний блинкен келәр һәптә ишқа ашурушни пиланлаватқан бейҗиң зийаритини кечиктүрди вә бу қарарға изаһат берип: «алди билән, һава бошлуқимизда — америка асминида көзитиш шари учуруш бизниң игилик һоқуқимизниң вә хәлқара қанунниң очуқ-ашкара дәпсәндә қилиниши болуп, буни қобул қилишқа болмайдиғанлиқини хитайға билдүрдуқ» деди.

шар киризисиниң икки тәрәп мунасивити вә икки дөләт хәлқи ортақ көңүл бөлидиған нурғун мәсилиләр музакирә қилинидиған бейҗиң зийаритиниң мәқситигә бузғунчилиқ қилғанлиқини әскәрткән министир антоний блинкен: «мениңчә, һава бошлуқи бу шәкилдә дәхлигә учриған һәр қандақ бир дөләт мушу шәкилдә инкас қайтуриду. әгәр бу иш хитайда йүз бәргән болса иди, билдүрүлидиған инкасниң қандақ болидиғанлиқини мән тәсәввур қилалаймән» дегәнләрни қәйт қилди.

хитай коммунистик партийәси ташқи мунасивәтләр директори ваң йи билән телефонда сөзләшкәнликини билдүргән министир блинкен : «бу бир мәсулийәтсиз һәрикәт болуп, хитайниң дәл мениң зийаритимдин илгирила бу қәдәмни ташлашқа қарар қилиши, биз өткүзүшни пиланлаватқан кәң даирилик сөһбәтләргә зийан йәткүзди» деди.