ب د ت ئامېرىكا - خىتاي جىددىيچىلىكىنىڭ ئۇلغىيىپ كېتىشىنى خالىمايدىغانلىقىنى بىلدۈردى

تۈركىيە ئاۋازى رادىيوسى خەۋىرى: ب د ت باش كاتىپى باياناتچىسى ستېفان دۇجارىك مۇخبىرلارنى كۈتۈۋېلىش يىغىنىدا «جاسۇسلۇق شارى» توغرىسىدا توختالدى؛ ب د ت نىڭ خىتاي بىلەن ئامېرىكا ئوتتۇرىسىدىكى زىددىيەتنىڭ كۈچىيىپ كېتىشىدىن ئەنسىرەيدىغانلىقىنى، باش كاتىپ ئانتونىيو گۇتېررېسنىڭ بۇ مەسىلىنى ئىزچىل تەكىتلەپ كېلىۋاتقانلىقىنى بىلدۈرۈپ: «بولۇپمۇ بۇ مەسىلىسىدە، ئىككى دۆلەت ئوتتۇرا يول تېپىشى كېرەك. مەن، ھەر ئىككى دۆلەتنىڭ دۇنيادىكى ئورنىنى نەزەردە تۇتۇپ، جىددىيچىلىكنى پەسەيتىش ئۈچۈن قولىدىن كېلىشىچە تىرىشچانلىق كۆرسىتىشى <مەسئۇلىيەتچانلىق> دەپ قارايمەن» دېدى.

ئامېرىكا مۇداپىئە مىنىستىرلىقىنىڭ بىر نەچچە كۈن ئىلگىرى ئامېرىكا چېگرالىرى ئىچىدە 60 مىڭ ئىنگلىز چىسى ئېگىزلىكتە ئۇچۇۋاتقان خىتاينىڭ ئالاھىدە ئېگىزلىكتىن كۆزىتىش شارىنى بايقىغانلىقىنى، شارنىڭ خەلق ئاۋىياتسىيەسى ياكى قۇرۇقلۇققا ماددىي خەۋپ يەتكۈزمىگەنلىكىنى ئېلان قىلىشىدىن كېيىن، ئامېرىكا تاشقى ئىشلار مىنىستىرى ئانتونىي بلىنكېن كېلەر ھەپتە ئىشقا ئاشۇرۇشنى پىلانلاۋاتقان بېيجىڭ زىيارىتىنى كېچىكتۈرگەنىدى.

خىتاي مەزكۇر شارنىڭ بىر ھاۋارايى تەكشۈرۈش شارى ئىكەنلىكىنى، ھاۋارايى شارائىتى سەۋەبىدىن يۆنىلىش ئۆزگەرتكەنلىكىنى ئىلگىرى سۈرگەن. پېنتاگون بولسا، بۇ ئىزاھاتلارنى رەت قىلىپ، ئۆزلىرىنىڭ شارنىڭ يۆنىلىش ئۆزگەرتىش ئىقتىدارىغا ئىگە ئىكەنلىكىنى، ئۇنىڭ بىر كۆزىتىش شارى ئىكەنلىكىنى بىلىدىغانلىقىنى بىلدۈرگەنىدى.