finlandiye we shiwétsiye natogha birlikte eza bolushni xalaydu

türkiye awazi radiyosi xewiri: finlandiye bash ministiri sanna marin bilen shiwétsiye bash ministiri ulf kristérshon stokholmda axbarat élan qilish yighini ötküzdi.

sanna marin bilen ulf kristérshon shiwétsiye bilen finlandiyening bixeterlikining bir-birige baghliq ikenlikini eskertip, natogha birlikte iltimas sunghanliqini we netijisini birlikte körüshni xalaydighanliqlirini éytti.

finlandiye bash ministiri sanna marin özlirining shiwétsiye bilen natogha eza bolushni iltimas qilghanliqini we bu basquchni birlikte tamamlashni xalaydighanliqini bayan qildi.

u: «birlikte tirishchanliq körsitiwatimiz. biz bu mesilide her küni yéqindin alaqilishiwatimiz, biz türkiye bilen wéngiriyening iltimasimizni baldurraq testiqlishini ümid qilimiz» dédi.

u rusiye-ukraina urushi sewebidin yawropa bixeterlik tertipining uzun muddetlik özgergenlikini, shunga natogha qétilishni ümid qilidighanliqlirini bildürdi.

u diniy ishlargha hörmet qilishning finlandiye qanunida barliqini eskertti we shiwétsiyening ezaliqigha uzun waqit ketse néme ish bolidighanliqi toghrisida toxtaldi.

u: «ehwalning siniptiki kepsiz balidek otturigha qoyulushi ejeblinerlik. shiwétsiyemu natogha eza bolush üchün teleplerni orunlawatidu. men shiwétsiyening <awarichiliq> süpitide tonitiliwatqan atmosférani yaqturmaymen» dédi.

shiwétsiye bash ministiri kiristérshonmu finlandiye bilen qoyuq munasiwetlirining barliqini bayan qilip, natogha eza bolush sepirini birlikte bashlap, birlikte dawam qiliwatqanliqlirini éytti.

u türkiye, finlandiye we shiwétsiye imzalighan üch terep esletmisini eslep mundaq dédi: «bügün etigen (2-féwral) kabinét yighinida, biz hökümetning térrorluqqa qarshi turush qanun layihesini resmiyleshtürduq. bu qanun layihesi martta parlaméntqa ewetilidu, yéngi térrorluqqa qarshi turush qanuni 6-ayning 1-künidin bashlap yolgha qoyulidu. bu shiwétsiyening uzun muddetlik térrorluqqa qarshi turush wedisining ul téshi» dédi.

u yéqindin buyan türkiye bilen bolghan jiddiylik we shiwétsiyediki ighwagerchilikler üstide toxtilip: «biz bu heriketler keltürüp chiqarghan ümidsizlikni chüshinimiz we ortaqlishimiz. méning barliq shiwétsiyeliklerge démekchi bolghinim intayin addiy؛ tinchlinip, chong weziyetke we heqiqiy ishlargha, shiwétsiyening natoning ezasi süpitide dölet bixeterlikini kücheytishke ehmiyet béreyli» dédi.

u shiwétsiyening üch terep esletmisi ramkisida, üstige chüshken wezipisini ada qilidighanliqini tekitlidi.