baydin iraq bash ministiri bilen téléfonlashti

türkiye awazi radiyosi xewiri: aqsaray teripidin élan qilinghan yazma bayanatta bildürülüshiche, amérika qoshma ishtatliri pirézidénti jo baydin iraq bash ministiri muhemmed shiya essudani bilen téléfonda körüshken.

ikki rehberning téléfon söhbitide, iraqning iqtisadiy tereqqiyatidin sirt yene, rayonluq we yer shariwi bixeterlik mesililiri heqqide muzakire élip bérilghan.

baydin amérika qoshma ishtatlirining iraq bilen imzalanghan istiratégiyelik ramka kélishige izchil emel qilidighanliqini eskertken, hemde iraq bash ministiri muhemmed shiya essudanining iraqning igilik hoquqi we musteqilliqini kücheytish yolida körsitiwatqan tirishchanliqlirigha yuqiri baha bergen.

bayanatta tekitlinishiche, ikki rehber yene, iraq bash ministiri muhemmed shiya essudanining iraqning iqtisadiy siyasetliri heqqide muzakire élip barghan. pirézidént baydin amérika qoshma ishtatlirining bu siyasetlerni testiqlashqa teyyar ikenlikini ipadiligen.

bayanatta, amérika qoshma ishtatliri pirézidénti jo baydinning, iraq tashqi ishlar ministiri fuad hüseyinning kéler hepte washingtonda ziyarette bolushini qizghin qarshi alidighanliqini éytqanliqi eskertilip mundaq déyilgen: «ikki rehber térrorluq teshkilati daéshning qayta iraq xelqi, rayon we xelqaraning bixeterlikige tehdit sélishigha yol qoymasliqqa kapaletlik qilishni ehde qildi, shundaqla, kelgüsi aylardimu dawamliq hemkarlishishni qararlashturdi.»

bayanatta qeyt qilinishiche, ikki rehberning téléfon söhbitige, aqsarayda dölet ishliri ziyaritide boluwatqan iyordaniye padishahi 2 – abdullahmu ishtirak qilghan bolup, u dölitining iraqning ortaq istiratégiyelik ul- eslihe layihelirinimu öz ichige alghan sahelirige yardem bériwatqanliqini tekitligen.