amérika taliban ezalirigha  wiza cheklimisi qoyidighanliqini élan qildi

türkiye awazi radiyosi xewiri: amérika tashqi ishlar ministiri antoni blinkén taliban hökümitining ayallar we qizlargha qaratqan zulumliri we zorawanliqlirigha qarshi heriketke ötidighanliqlirini éytti.

blinkén afghanistandiki ayallargha qaritilghan basturush siyasitige we zowanliqlirigha mesul yaki jinayet shériki dep qaralghan hazirqi shundaqla sabiq taliban ezaliridin bashqa yene, dölet sirtidiki bixeterlik guruppiliri ezaliri we bashqilargha qoshumche wiza cheklimisi qoyush üchün heriketke ötkenliklirini tekitlep: «bundaq kishilerning yéqin aile ezalirighimu wiza cheklimisi qoyulushi mumkin» dédi.

blinkén talibanning bu qarari arqiliq afghanistan xelqining parawanliqigha yene bir qétim perwasiz muamile qilghanliqini tekitlidi. talibanning heriketlirining 1 milyondin artuq oqush yéshidiki qizlarni we nurghun yash ayallarni maariptin mehrum qilghanliqini, sansizlighan ayallarning uniwérsitétlardin chiqiriwétilgenlikini we emgek küchidin chetke qéqilghanliqini bildürdi.

talibanning herikitini eng küchlük eyibleydighanliqlirini tekitligen antoni blinkén, amérikaning ayallar we qizlarnimu öz ichige alghan barliq afghanistanliqlarning kishilik hoquqi we eqelliy erkinlikini qoghdash üchün pütün küchi bilen tirishidighanliqini éytti.

taliban 2021-yili 15-awghustta afghanistanning hakimiyitini alqinigha alghandin kéyin, ayallar we qizlar maarip qatarliq nurghun sahelerdiki heq-hoquqliridin mehrum qalmaqta.

taliban hökümiti dékabirda (2022) qiz oqughuchilarning uniwérsitétlardiki maaripining ikkinchi buyruq chüshkenge qeder toxtitilghanliqini élan qilghan idi.