ostin amérika-jenubiy koréye ittipaqini tekitlidi

türkiye awazi radiyosi xewiri: amérika dölet mudapie ministiri lloyd ostin tünügün (30-yanwar) ikki künlük ziyaret üchün jenubiy koréye paytexti séulgha yétip keldi. u uchrishishlirini bashlashtin ilgiri jenubiy koréyening yonxap agéntliqida «ittipaq saqlawatidu» serlewhiside maqale élan qildi.

u maqaliside, amérikaning muntizim armiyesi, yadro we bashqurulidighan bombidin mudapielinish küchi, shundaqla jenubiy koréyediki 28 ming amérika eskiri bilen, ortaq mudapielinish wedisige emel qilidighanliqini bildürüp: «düshmenlirimiz we reqiplirimiz shuni bilishi kérekki, eger birimizge tehdit salsa, bir pütün halda amérika-jenubiy koréye ittipaqigha tehdit salghan bolidu» dédi.

u shimaliy koréyening yéqinqi yillarda yadro, bashqurulidighan bomba we bashqa qorallarni tereqqiy qildurghanliqini, b d t xewpsizlik kéngishining qararlirigha qarshi halda rékort sewiyede bashqurulidighan bomba sinaq qilghanliqini eskertip: «amérikaning jenubiy koréyege kéngeytilgen tewrenmes wedisini yene bir qétim tekitlesh üchün bu yerge keldim» dédi.

u amérika we jenubiy koréye otturisidiki shériklik munasiwitining «tarixtiki eng küchlük, eng janliq we özara hemkarlishidighan ittipaq» ikenlikini bildürüp, shimaliy koréyening tehditlirige qarshi ötküzülidighan ortaq herbiy manéwirlarning kölimi we dairisini kéngeytish, «janliq urush amilliri» ni qoshush kéreklikini qeyt qildi.

u washington, séul we tokyo arisidiki üch terep xewpsizlik hemkarliqining ehmiyitini tekitlep: «amérika, jenubiy koréye we yaponiye birlikte bolghanda, hemmimiz téximu bixeter bolimiz» dédi.

u bügün (31-yanwar) jenubiy koréye dölet mudapie ministiri li jongsup we bashqa mesul emeldarlar bilen körüshidu.