makron ukrainagha urush ayropilani ewetishning tallash sirtida emeslikini éytti

türkiye awazi radiyosi xewiri: firansiye pirézidénti émmanuél makron gollandiye ziyariti dairiside, bash ministir mark rutté bilen birleshme axbarat élan qilish yighini ötküzdi.

makron rutté bilen élip barghan uchrishishida, ukraina mesilisini muzakire qilghanliqlirini we ukrainani zörür tépilghanda hemmila sahede qollashta qetiy iradige ige ikenliklirini namayan qilghanliqlirini bildürdi.

makron ukrainagha küreshchi ayropilan ewetish toghrisidiki soalgha jawab bérip, «héchqandaq ish tallash sirtida emes» dédi we jiddiylikni kücheytmeslik, rusiye tupriqida ishletmeslik we firansiye armiyesining küchini ajizlashturmasliq sherti bilen, ukrainagha urush ayropilani bérishke bolidighanliqidin bésharet berdi.

makron ukrainaning urush ayropilani üchün resmiy telep sunushi kéreklikini tekitlidi, rutté bolsa, ukrainadin téxiche bundaq bir telepning kelmigenlikini eskertti.

bu jeryanda, firansiye dölet mudapie ministiri sébastiyén lékornu firansiye we awstiraliyening ukrainagha 155 millimétirliq zembirek oqi ewetidighanliqini élan qildi.

lékornu tunji mal yetküzüshning bir nechche hepte ichide bashlinidighanliqini bildürdi.

yene bir tereptin, wéngiriye dölet mudapie ministiri kristof szalay-bobrowinichkiy urushni téximu keskinleshtürmeslik üchün wéngiriye bilen awstiriyening ukrainagha qoral ewetmeydighanliqini éytti.