стенстром: шиветсийәдә тәшкиллик җинайәт шайкилири террорчиларни мәбләғ билән тәминлимәктә

түркийә авази радийоси хәвири: шиветсийәниң шималий атлантик әһди тәшкилати-натоғаға әза болуш мәсилисигә мәсул баш музакиричиси оскар стенстром, бөлгүнчи террорлуқ тәшкилати п к к/й п г ниң шиветсийәдики әһвали үстидә тохтилип: «шиветсийәдә тәшкиллик җинайәт шайкилири п к к ни мәбләғ билән тәминлимәктә» деди.

оскар стенстром шиветсийә дөләт радийосиға бәргән байанатида, келәр һәптә түркийә, шиветсийә вә финландийә оттурисидики шималий атлантик әһди тәшкилатиға әза болуш мәсилисигә алақидар үч тәрәп механизми йиғинини қайтидин башлаш үчүн түркийә билән алақилишишни ойлишиватқанлиқини ейтти.

стенстром: «һазирчә пайдилиқ вә ишәнчлик бир учришиш болмайдиғанлиқи сәвәбидин, бир йәргә җәм болуп, сөһбәтлишишниң әһмийити йоқ. бәлким бу еһтималлиқ җәрйанини қийинлаштуруши мумкин. лекин йүзтуранә музакириләрниң давамлишиши үчүн түркийә тәрәп билән келәр һәптиниң бешида алақилишишни ойлишиватимән» деди.

стенстром шиветсийә вә финландийә билән даимий бирләшмә механизм йиғинлириниң кечиктүрүлүши үстидиму тохтилип: «гәрчә қилинған иш қанунлуқ болсиму, түркийәниң стокһолм әлчиханиси алдида қуран кәримни көйдүрүш пүткүл динни рәнҗитти. бу шималий атлантик әһди тәшкилати музакирилиригә нисбәтән һәргизму иҗабий әмәс. бу бир ечинишлиқ әһвал вә биз бу һәқтики көз қаришимизни оттуриға қойдуқ» деди.

бөлгүнчи террорлуқ тәшкилати п к к/й п г һәққидиму байанат елан қилған стенстром: «түркийәниң финландийәгә диққәт қилишиниң сәвәби, бу тәшкилатниң шиветсийәдики иқтисад мәнбәсиниң техиму көп болушиға мунасивәтликтур. шиветсийәдә тәшкиллик җинайәт шайкилири п к к ни мәбләғ билән тәминлимәктә. финландийәгә охшимайдиғини, шиветсийәдә п к к ниң техиму көп малийә мәнбәси бар» деди.