pirézidént baydin ukraina kütüwatqan xush xewerni élan qildi

türkiye awazi radiyosi xewiri: amérika pirézidénti jo baydin aqsarayda élan qilghan bayanatida: « abrams tankiliri dunyadiki eng yéngi iqtidarliq takilar. bular ukrainaning zéminini qoghdash we istratégiyelik nishanigha yétish iqtidarini kücheytidu» dédi.

u tankilarni asirash we ishlitish téxnikilirining intayin murekkep ikenlikini, shunga ukraina eskerlirini eng qisqa waqit ichide terbiyeleshni bashlaydighanliqlirini bildürdi.

u tankilarni tapshurush ishlirining, ukrainaliqlar abrams tankilirini mudapie ishlirigha maslashturushqa teyyar bolghanda emelge ashidighanliqini qeyt qildi.

amérika tashqi ishlar ministiri néd prays ukrainagha bérilidighan tankilar heqqide toxtalghanda, «ukrainaning peqet zéminini qoghdash üchün ishlitish» shertining barliqini eskertti.

amérika mezkur qararni chiqirishi bilen teng, gérmaniyemu ukrainagha «2-yilpiz» namliq tanka béridighanliqini élan qilghan idi.

ukraina pirézidénti wolodimir zélénskiy amérika bilen gérmaniyening tanka bérish qarari üstide toxtilip: «bügün ukraina üchün kishini intayin söyündüridighan xush xewerler küni. emdi tanka birleshmisi bar» dédi.

u widéosida: «urushning qisqa waqit ichide axirlishishi üchün tankilardin bashqa, yiraq musapiliq bashqurulidighan bomba, zembirek sistémiliri we küreshchi ayropilanlargha éhtiyajliqmiz. aldinqi seplerdiki qehrimanlirimiz dunyadin qanchilik köp mudapie qoralliri alsa, rusiyening urushqaqliqi shunchilik téz axirlishidu» dédi.

rusiye 24-féwral (2022) ukrainagha qarshi ishghal herikitini bashlighan idi.