iran yawropa we engliyege jaza yürgüzidighanliqini bildürdi

türkiye awazi radiyosi xewiri: iran resimiy xewer agéntliqi — irna, iran tashqi ishlar ministirliqi bayanatchisi nasir kenanining, yawropa ittipaqi bilen engliyening téhrangha qaratqan eng yéngi jazaliri toghrisida bayanat élan qilghanliqini xewer qildi.

xewerde körsitilishiche, kenani téhranning yawropa ittipaqi bilen engliyening jazasini eyibleydighanliqini tilgha élip: «yawropa ittipaqi we engliye hakimiyetlirining bu herikiti, ularning iranning réalliqini toluq menide chüshinip yétishtiki eqliy yétersizliklirining bir alamiti» dégen we sözini dawamlashturup: «iran bu xil meghlub siyasetlerge jawab qayturush hoquqini saqlap qalghan bolup, pat yéqinda yawropa ittipaqi we engliyediki kishilik hoquqni depsende qilghuchilar bilen térrorluqni qollighuchilargha qarita yéngi jaza tizimlikini élan qilidu» dégenlerni qeyt qilghan.

yawropa ittipaqigha eza döletler, mahsa emini isimlik iranliq bir qizning séntebirde (2022) nazaret astidiki mezgilide ölüp kétishidin kéyin bashlanghan namayishlarni basturushta rol  oynighan 18 iranliq bilen 19 iran shirkitige jaza yürgüzüshni qarar qilghanidi.

engliyemu «namayishlarni basturush jeryanidiki kishilik hoquq depsendichilikliri» we jasusluq qilish bilen eyiblengen iran-engliye qosh puqraliq salahiyitige ige eli riza ekberge ölüm jazasi bérilishige naraziliq bildürüp, iranning bir qisim emeldarliri we teshkilatlirini jaza tizimlikige kirgüzgenlikini élan qilghanidi.