رۇسىيەنىڭ ئالدىنقى سەپلەرگە ئەسكەر سەپلىگەنلىكى ئىلگىرى سۈرۈلدى

تۈركىيە ئاۋازى رادىيوسى خەۋىرى: ئامېرىكا دۆلەت مۇداپىئە مىنىستىرلىقىنىڭ يۇقىرى دەرىجىلىك بىر ھەربىي ئەمەلدارى، 24-فېۋرالدىن (2022) بۇيان داۋام قىلىۋاتقان ئۇكرائىنا-رۇسىيە ئۇرۇشى توغرىسىدا بايانات بېرىپ، ئۇكرائىنا ئارمىيەسىنىڭ دۆلەتنىڭ شەرقىدىكى رۇسىيە كونتروللۇقىدىكى كرېمىننا بازىرىغا ھۇجۇم قوزغاپ، ئازراق بولسىمۇ ئىلگىرىلىگەنلىكىنى بىلدۈردى.

ئۇ رۇسىيەنىڭ باھمۇت بازىرىغا يېقىن رايونلارنى ئىگىلەشكە تىرىشىۋاتقانلىقىنى، رايوندىكى توقۇنۇشلارنىڭ داۋام قىلىۋاتقانلىقىنى ئەسكەرتتى.

رۇسىيەنىڭ رايوندا ئېغىر تالاپەتكە ئۇچرىغانلىقىغا ئىشارەت قىلغان مەزكۇر ئەمەلدار، رۇسىيە ئارمىيەسىنىڭ ھەپتە ئاخىرىدا ئالدىنقى سەپكە نەچچە ئونمىڭ قوشۇمچە ئەسكەر يۆتكىگەنلىكىنى تىلغا ئېلىپ: «قوشۇننى كۈچەيتىش ۋە جېنىدىن ئايرىلغانلارنىڭ ئورنىنى تولدۇرۇش جەھەتتە بۇ خېلى كۆپ كۈچ بولسىمۇ، بۇ كۈچلەرنى مەشىقلەندۈرۈشتە كۆرۈنەرلىك ياخشىلىنىش يوق. مەشىق ۋە ئۈسكۈنىلەرنىڭ كەمچىل بولۇشىغا قارىماي، ئۇلار ئالدىراپلا جەڭگە ئەۋەتىلدى» دېگەنلەرنى قەيت قىلدى.