rusiye: nato bilen yawropa xitay bilen  siyasiy jughrapiyelik riqabetke tutush qildi

türkiye awazi radiyosi xewiri: rusiye tashqi ishlar ministirliqi bayanatchisi mariya zaxarowa yazma bayanat élan qilip, nato bilen yawropa ittipaqining hemkarliqni téximu yuqiri pellige kötürüsh, rusiye bilen xitaygha qarshi hemkarliqni kücheytish we ukrainani qollashni dawamlashturush toghrisida birleshme xitabname imzalishigha  naraziliq bildürdi.

zaxarowa yawropa ittipaqi bilen natoning dunya miqyasida yéngi bir hemkarliq sewiyesige qarap ilgirilep, xitay bilen  siyasiy jughrapiyelik riqabetke tutush qilghanliqini ilgiri sürgendin kéyin, birleshme xitabnamige «gherbning üstünlük pelsepesige yene bir medhiye» dep baha berdi.

nato bilen yawropa ittipaqining özlirining puqraliri üchün barliq siyasiy, iqtisadiy we herbiy wasitilerni ishlitidighanliqini ochuq bayan qilghanliqini tilgha alghan zaxarowa, gherbning dunyaning bashqa jaylirigha bu qorallarning yardimide qayta shekillendürüshke tégishlik düshmen muhit dep qaraydighanliqini otturigha qoydi.

yawropa ittipaqining tashqi munasiwet we bixeterlik siyasiti boyiche aliy wekili josép borrélning yawropa ittipaqini gül - gülistanliq bir bagh, uning etrapidiki dunyani bu baghqa qarap ilgirilewatqan ormangha oxshatqanliqini eslitip ötken zaxarowa, emeliyette bu «orman» ning yawropagha tehdit élip kelmeydighanliqini, emma bir qutupluq dunya yaritishqa urunuwatqan yawropa ittipaqi bilen natoning jinayetchi ikenlikini éytti.

bayanatchi zaxarowa sözini dawamlashturup: «shunisi éniqki, nato bilen yawropa ittipaqining musteqil tashqi siyaset yürgüzgen döletlerge qaratqan urushqaq, jédelxor pozitsiyeliri, döletlerni <biz> we <ular> dep ayrishqa urunushliri, toqunushlarning tinch hel qilinishining aldini tosup, xelqaraning bixeterliki we térrorizmgha qarshi küreshni ajizlitidu» dégenlerni qeyt qildi.