kim jongun qiteler ara yéngi bir ballistik bashqurulidighan bomba tereqqiy qilduridighanliqini éytti
shimaliy koréye rehbiri kim jongun yéngi yilda dölitining yadroluq qoral-yaragh ambirining iqtidarini téz sürette ashurup, yéngi bir qiteler ara ballistik bashqurulidighan bomba tereqqiy qildurush kéreklikini éytti.
türkiye awazi radiyosi xewiri: kim jongun bu uchurini hakimiyet béshidiki ishchilar partiyesining pyongyangning yéngi yilliq asasliq siyaset yönilishini békitish üchün chaqirilghan omumiy yighinigha yollidi.
kim jongun jenubiy koréye ochuq düshmenge aylanghan ehwalda taktikiliq yadro qorallirini türkümlep ishlepchiqirishning muhimliqi we zörürlükini tekitlep, döletning yadro qoral ambirini hessilep ashurush chaqiriqida boldi.
u yene dölitining herbiy iqtidarini qetiylik bilen kücheytish meqsitide yéngi bir qiteler ara ballistik bashqurulidighan bombini tereqqiy qildurush we jasusluq süniy hemrahini baldurraq orbitigha qoyup bérish kéreklikini tekitlidi.
shimaliy koréye 2022 - yili ilgiriki yillardikige sélishturghanda téximu köp bashqurulidighan bomba qoyup bérip, koréye yérim arili we sherqiy asiyada jiddiychilikni kücheytiwetken idi.
pyongyang hökümiti sherq we gherb terepke her xil tiptiki we her xil musapiliq 90 din artuq bashqurulidighan bomba qoyup bergen bolup, noyabirning béshida bir kündila 23 bashqurulidighan bomba atqan idi.
shimaliy koréye yene 2023 - yilining deslepki saetliridimu ballistik bashqurulidighan bomba sinaq qildi.
jenubiy koréye armiye bash ishtab bashliqi shu yerning waqti etigen saet 2 din 50 minut ötkende shimaliy koréyening ryongsong rayonidin qisqa musapilik ballistik bashqurulidighan bomba qoyup bergenlikini bildürdi.
