albaniyede «2 t b -bayraktar» uchqusini sétiwélish kélishimi imzalandi

türkiye awazi radiyosi xewiri: albaniye dairilirining melumatida bildürülishiche, paytext tiranada bash ministirliq ishxanisida kélishim imzalash murasimi ötküzülgen. murasimgha, bash ministir édi rama, dölet mudapie ministiri niko péléshi, türkiyening tiranada turushluq bash elchisi tayyar qaghan, baykar shirkitining bash mudiri xaluq bayraktar qatnashqan.

bash ministir rama murasimda söz qilip, türkiye jumhur reisi rejep tayyip erdoghangha kélishimning tüzülüshige qilghan yardimi üchün teshekkür éytti.

u ikki dölet otturisidiki mewjut munasiwetlerning kün ötkenséri téximu yaxshiliniwatqanliqini bildürüp: «türkiye jumhuriyiti we jumhur reis rejep tayyip erdoghan bilen yawropa-atlantik jemiyetlirining eng chong herbiy ittipaqi bolghan natoda toghra yerde we toghra septe turghanilqimizdin özimizni shereplik hés qilimiz. türkiye jumhuriyiti bilen otturimizda nurghun istratégiyelik shériklik munasiwetlirimiz bar. bügün munasiwetlirimiz üchün intayin güzel bir kün boldi» dédi.

u kélishimning peqet qoralliq uchqularni sétiwélish üchünla imzalanmighanliqini, belki albaniye armiyesi bilen baykar shirkiti otturisida özara hemkarliq köwrüki berpa qilishqimu munasiwetlik ikenlikini tekitlep: «baykar albaniyede sélinghan natoning yéngi kuchowa hawa armiye bazisidiki eng yuqiri téxnologiyege ige kontrol merkizini ötküzüwélishqa teyyarliniwatqan kishilerni terbiyelesh ishlirighimu yardemlishidu» dédi.

u albaniyege keltürülidighan üch qoralliq uchquning dölet xewpsizlikige tehdit élip kélidighan her qandaq ehwalgha qarshi teyyar halette bolidighanliqini qeyt qildi.

baykar shirkitining bash mudiri xaluq bayraktar bu téxnologiyening ikki dölet otturisida yéngi dewrning bashlinishigha, albaniyening igilik hoquqigha we xelqining bixeterlikige paydiliq bolushini tileydighanliqini bildürdi.