кайконен: финландийә түркийәниң бихәтәрлик әндишәлирини чүшиниду

финландийә дөләт мудапиә министири антти кайконен (Antti Kaikkonen) түркийәниң бихәтәрлик әндишәлирини чүшинидиғанлиқлирини вә террорлуққа қарши күрәштә қәтий қарарға игә икәнликлирини ейтти.

1916911
кайконен: финландийә түркийәниң бихәтәрлик әндишәлирини чүшиниду

түркийә авази радийоси хәвири: финландийә дөләт мудапиә министири антти кайконен рәсмий дөләт ишлири зийарити үчүн әнқәрәгә йетип кәлди. у анадолу агентлиқиниң зийаритини қобул қилғанда, түркийә дөләт мудапиә министири хулуси ақар билән көрүшүп, йавропаниң нөвәттики вәзийити үстидә интайин йахши сөһбәтләрни өткүзгәнликлирини қәйт қилди.

у өзиниңму, министир хулуси ақарниңму украинаниң нөвәттики вәзийитидин әндишә қилидиғанлиқлирини билдүрүп: «наһайити әпсуски, бу тирагедийәлик уруш тез ахирлашмайдиғандәк туриду, әмма биз тинчлиқ қанчилиқ балдур орнитилса шунчилик йахши болиду дәп қараймиз» деди.

у хулуси ақар билән финландийә вә шиветсийәниң натоға әза болуш илтимаси һәмдә мадридта имзаланған финландийә-шиветсийә-түркийә үч тәрәп келишиминиму музакирә қилғанлиқлирини әскәртип, учришишниң иҗабий вә йахши муһитта өткәнликини билдүрди.

у түркийәниң бихәтәрлик әндишәлирини һәқиқәтән тоғра чүшинидиғанлиқлирини әскәртип: «түркийә финландийәниң террорлуққа қарши күрәштә қәтий қарарға игә икәнликигә ишәнсә болиду. буниңда һечқандақ гуман йоқ» деди.

у натоға әза болған әһвалда финландийәниң русийәгә қарши һәрбий күчни техиму күчәйтиш мәқситидә, иттипақниң һәрбий қисимлирини вә тактикилиқ йадро қораллирини финландийәгә орунлаштурушқа рухсәт қилип-қилмайдиғанлиқи тоғрисидики соалға: «йадро қораллири тоғрисидики дәталашларға очуқ позитсийә тутимиз. буларниң бизниң земинимизда болушиға алаһидә көңүл бөлүп кәтмәймиз. нато финландийәгә йадро қораллирини әвәтмәйду. буни наһайити ениқ билимән» дәп җаваб бәрди.        



مۇناسىۋەتلىك خەۋەرلەر