blinkén: türkiyening yolluq endisheliri bar

amérika tashqi ishlar ministiri antoni blinkén türkiyening finlandiye bilen shiwétsiyening natogha eza bolushi mesiliside muhim xewpsizlik endishelirini otturigha qoyghanliqini, bu endishelerni tügitish üchün bu jeryandin ünümlük paydilinilghanliqini éytti.

1916798
blinkén: türkiyening yolluq endisheliri bar

türkiye awazi radiyosi xewiri: amérika tashqi ishlar ministiri antoni blinkén, finlandiye tashqi ishlar ministiri pékka xawisto we shiwétsiye tashqi ishlar ministiri tobiyas billström bilen körüshüshni axirlashturup, birlikte axbarat élan qilish yighini ötküzdi.

antoni blinkén finlandiye we shiwétsiyening nato ittipaqdishi bolushqa teyyar ikenlikini bildürüp, türkiyening bu ikki döletning ezaliq musapisini kéchiktürgenliki toghrisidiki eyibleshlerge jawab berdi.

u ilgiri bashqa döletlerning natogha eza bolush musapisining, bu ikki döletke oxshash téz bolmighanliqini we musapining uyghun shekilde dawamlishiwatqanliqini eskertti.

u mundaq dédi:

«türkiye bu musapide muhim xewpsizlik endishelirini otturigha qoydi. her ikki dölet bu endishelerni konkrét qedemler netijiside tügitish üchün türkiye we nato bilen muweppeqiyetlik halda kélishimlerni tüzdi. türkiye otturigha qoyghan endishelerni hel qilish üchün ikki döletning konkrét qedemlerni tashlighanliqini körduq. shunga, men buning algha ilgirileydighanliqigha ishinimen. ishlar muwapiq ilgirilewatidu we biz ularni pat arida eza süpitide körimiz.»

u amérikaning néme üchün bu mesilige téximu köp arilashmaydighanliqi toghrisidiki soalgha jawab bérip, buning amérika bilen türkiye otturisidiki ikki tereplik mesile emeslikini, amérikaning bu mesilini ikki dölet mesilisige aylandurmaydighanliqini tekitlidi.

u natogha eza qobul qilishta, pütün ittipaqning daxil bolghanliqini we türkiyening endishelirini hel qilish musapisigha yardem qilghanliqlirini eskertip, türkiyening endishelirining yolluq ikenlikini we buni toghra chüshinidighanliqlirini qeyt qildi.

finlandiye tashqi ishlar ministiri xawisto barliq ittipaqdashlirining xewpsizlik endishelirige estayidil muamile qilidighanliqini bildürdi.

shiwétsiye tashqi ishlar ministiri billström pat arida enqereni ziyaret qilip, türkiyening bölgüchi térrorluq teshkilati p k k ning shiwétsiyede mewjut bolup turushigha munasiwetlik endisheler we kélishimning ijra qilinishi toghrisida muzakire ötküzidighanliqlirini éytti.



مۇناسىۋەتلىك خەۋەرلەر