блинкен: түркийәниң йоллуқ әндишәлири бар

америка ташқи ишлар министири антони блинкен түркийәниң финландийә билән шиветсийәниң натоға әза болуши мәсилисидә муһим хәвпсизлик әндишәлирини оттуриға қойғанлиқини, бу әндишәләрни түгитиш үчүн бу җәрйандин үнүмлүк пайдилинилғанлиқини ейтти.

1916798
блинкен: түркийәниң йоллуқ әндишәлири бар

түркийә авази радийоси хәвири: америка ташқи ишлар министири антони блинкен, финландийә ташқи ишлар министири пекка хависто вә шиветсийә ташқи ишлар министири тобийас биллстрөм билән көрүшүшни ахирлаштуруп, бирликтә ахбарат елан қилиш йиғини өткүзди.

антони блинкен финландийә вә шиветсийәниң нато иттипақдиши болушқа тәййар икәнликини билдүрүп, түркийәниң бу икки дөләтниң әзалиқ мусаписини кечиктүргәнлики тоғрисидики әйибләшләргә җаваб бәрди.

у илгири башқа дөләтләрниң натоға әза болуш мусаписиниң, бу икки дөләткә охшаш тез болмиғанлиқини вә мусапиниң уйғун шәкилдә давамлишиватқанлиқини әскәртти.

у мундақ деди:

«түркийә бу мусапидә муһим хәвпсизлик әндишәлирини оттуриға қойди. һәр икки дөләт бу әндишәләрни конкрет қәдәмләр нәтиҗисидә түгитиш үчүн түркийә вә нато билән мувәппәқийәтлик һалда келишимләрни түзди. түркийә оттуриға қойған әндишәләрни һәл қилиш үчүн икки дөләтниң конкрет қәдәмләрни ташлиғанлиқини көрдуқ. шуңа, мән буниң алға илгириләйдиғанлиқиға ишинимән. ишлар мувапиқ илгириләватиду вә биз уларни пат арида әза сүпитидә көримиз.»

у американиң немә үчүн бу мәсилигә техиму көп арилашмайдиғанлиқи тоғрисидики соалға җаваб берип, буниң америка билән түркийә оттурисидики икки тәрәплик мәсилә әмәсликини, американиң бу мәсилини икки дөләт мәсилисигә айландурмайдиғанлиқини тәкитлиди.

у натоға әза қобул қилишта, пүтүн иттипақниң дахил болғанлиқини вә түркийәниң әндишәлирини һәл қилиш мусаписиға йардәм қилғанлиқлирини әскәртип, түркийәниң әндишәлириниң йоллуқ икәнликини вә буни тоғра чүшинидиғанлиқлирини қәйт қилди.

финландийә ташқи ишлар министири хависто барлиқ иттипақдашлириниң хәвпсизлик әндишәлиригә әстайидил муамилә қилидиғанлиқини билдүрди.

шиветсийә ташқи ишлар министири биллстрөм пат арида әнқәрәни зийарәт қилип, түркийәниң бөлгүчи террорлуқ тәшкилати п к к ниң шиветсийәдә мәвҗут болуп турушиға мунасивәтлик әндишәләр вә келишимниң иҗра қилиниши тоғрисида музакирә өткүзидиғанлиқлирини ейтти.



مۇناسىۋەتلىك خەۋەرلەر