yawropa rusiyege 9-qétimliq émbargo pilanini teyyarlidi

türkiye awazi radiyosi xewiri: yawropa ittipaqi komitéti bashliqi ursula fondérléyén twittér adrésida, rusiyege qarshi émbargo pilanining tepsilatliri chüshendürülgen bir widéo hembehirlidi.

u rusiyening ukrainagha ölüm we weyranchiliq élip kélshini dawamlashturuwatqanliqini bildürüp, rusiyening puqralargha we ul-eslihelerge hujum qilip, ukrainani qish peslide palech ehwalgha chüshürüshke tirishiwatqanliqini qeyt qildi.

u ukrainani dawamliq qollaydighanliqlirini eskertip: «biz hazirghiche ijra qilip kéliwatqan sekkiz émbargo pilani rusiyeni qiynawatidu. bügün 9-émbargo pilani bilen rusiyege bolghan bésimni téximu kücheytimiz» dédi.

u yawropa ittipaqining émbargo tizimlikige texminen 200 kishi we qurulushlarni kirgüzüshni teklip qilghanliqini eskertip, tizimlikning rusiye armiyesining ofitsérliri, rusiye dumasi we fédératsiye kéngishining ezalirini, ministirlar, shundaqla nurghun siyasetchilerni öz ichige alidighanliqini qeyt qildi.

u ukrainaliq kichik balilarni rusiyege élip qachqanlar we ukrainaning yéza igilik mehsulatlirini oghrilighanlarningmu tizimlikke kirgüzülgenlikini bildürdi.

u rusiye rayonluq tereqqiyat bankasigha toluq soda cheklimisi qoyulghanliqini, üch bankagha émbargo yürgüzülüshni teklip qilghanliqlirini eskertip, bularning meqsitining rusiye pirézidénti wladimir putinning maliye wastilirini üzüp tashlash ikenlikini sözlirige ilawe qildi.

u mundaq dédi: «rusiyening her türlük uchqu we dronlargha érishishini üzüp tashlaymiz. uchqu motorlirining rusiyege we irangha oxshash rusiyeni bu xil mehsulatlar bilen teminliyeleydighan üchinchi döletlerge éksport qilinishimu cheklinidu.»

u rusiyening tetür teshwiqat qilishiningmu aldini alidighanliqlirini, bu ramkida rusiyening töt téléwiziye qaniligha émbargo yüzgüzülidighanliqini uqturdi.

u: «rusiye énérgiyesi we kanchiliq sahesige qarshi téximu küchlük iqtisadiy tedbirlerning yolgha qoyulushinimu teklip qilimiz» dédi.

yawropa ittipaqi komitéti tekliplirining ijra qilinishi üchün yawropa ittipaqigha eza döletler testiqlishi kérek.