йавропа русийәгә 9-қетимлиқ ембарго пиланини тәййарлиди

йавропа иттипақи комитети башлиқи урсула фондерлейен русийәгә қарши 9-қетимлиқ ембарго пиланини тәййарлиғанлиқлирини билдүрди.

1916516
йавропа русийәгә 9-қетимлиқ ембарго пиланини тәййарлиди

түркийә авази радийоси хәвири: йавропа иттипақи комитети башлиқи урсула фондерлейен твиттер адресида, русийәгә қарши ембарго пиланиниң тәпсилатлири чүшәндүрүлгән бир видео һәмбәһирлиди.

у русийәниң украинаға өлүм вә вәйранчилиқ елип келшини давамлаштуруватқанлиқини билдүрүп, русийәниң пуқраларға вә ул-әслиһәләргә һуҗум қилип, украинани қиш пәслидә паләч әһвалға чүшүрүшкә тиришиватқанлиқини қәйт қилди.

у украинани давамлиқ қоллайдиғанлиқлирини әскәртип: «биз һазирғичә иҗра қилип келиватқан сәккиз ембарго пилани русийәни қийнаватиду. бүгүн 9-ембарго пилани билән русийәгә болған бесимни техиму күчәйтимиз» деди.

у йавропа иттипақиниң ембарго тизимликигә тәхминән 200 киши вә қурулушларни киргүзүшни тәклип қилғанлиқини әскәртип, тизимликниң русийә армийәсиниң офитсерлири, русийә думаси вә федератсийә кеңишиниң әзалирини, министирлар, шундақла нурғун сийасәтчиләрни өз ичигә алидиғанлиқини қәйт қилди.

у украиналиқ кичик балиларни русийәгә елип қачқанлар вә украинаниң йеза игилик мәһсулатлирини оғрилиғанларниңму тизимликкә киргүзүлгәнликини билдүрди.

у русийә районлуқ тәрәққийат банкасиға толуқ сода чәклимиси қойулғанлиқини, үч банкаға ембарго йүргүзүлүшни тәклип қилғанлиқлирини әскәртип, буларниң мәқситиниң русийә пирезиденти владимир путинниң малийә вастилирини үзүп ташлаш икәнликини сөзлиригә илавә қилди.

у мундақ деди: «русийәниң һәр түрлүк учқу вә дронларға еришишини үзүп ташлаймиз. учқу моторлириниң русийәгә вә иранға охшаш русийәни бу хил мәһсулатлар билән тәминлийәләйдиған үчинчи дөләтләргә експорт қилинишиму чәклиниду.»

у русийәниң тәтүр тәшвиқат қилишиниңму алдини алидиғанлиқлирини, бу рамкида русийәниң төт телевизийә қанилиға ембарго йүзгүзүлидиғанлиқини уқтурди.

у: «русийә енергийәси вә канчилиқ саһәсигә қарши техиму күчлүк иқтисадий тәдбирләрниң йолға қойулушиниму тәклип қилимиз» деди.

йавропа иттипақи комитети тәклиплириниң иҗра қилиниши үчүн йавропа иттипақиға әза дөләтләр тәстиқлиши керәк.



مۇناسىۋەتلىك خەۋەرلەر